വഡോദര പാലം തകർന്ന് മരിച്ചവരുടെ എണ്ണം 13 ആയി
വഡോദര: (ജൂലൈ 10) ഗുജറാത്തിലെ വഡോദര ജില്ലയിൽ നദിക്ക് കുറുകെയുണ്ടായ പാലം തകർന്നതിനെ തുടർന്നുണ്ടായ അപകടത്തിൽ മരിച്ചവരുടെ എണ്ണം 13 ആയി. രണ്ട് മൃതദേഹങ്ങൾ കൂടി കണ്ടെത്തിയതോടെയാണ് മരണസംഖ്യ ഉയർന്നതെന്ന് അധികൃതർ വ്യാഴാഴ്ച അറിയിച്ചു.
നാല് പതിറ്റാണ്ടിലേറെ പഴക്കമുള്ള പാലത്തിന്റെ ഒരു ഭാഗം ബുധനാഴ്ച രാവിലെ പദ്ര പട്ടണത്തിന് സമീപം ഗംഭീര ഗ്രാമത്തിനടുത്ത് തകർന്നുവീണതിനെ തുടർന്ന് നിരവധി വാഹനങ്ങൾ മഹിസാഗർ നദിയിലേക്ക് പതിക്കുകയായിരുന്നു.
“ബുധനാഴ്ച രാത്രി നദിയിൽ നിന്ന് രണ്ട് മൃതദേഹങ്ങൾ കൂടി കണ്ടെടുത്തതോടെ പാലം തകർന്നതിനെ തുടർന്നുള്ള മരണസംഖ്യ 13 ആയി. അപകടത്തിൽ പരിക്കേറ്റ അഞ്ച് പേർ നിലവിൽ ആശുപത്രിയിൽ ചികിത്സയിലാണ്,” വഡോദര ജില്ലാ പോലീസ് സൂപ്രണ്ട് റോഹൻ ആനന്ദ് പറഞ്ഞു.
രാത്രി കണ്ടെത്തിയ രണ്ട് മൃതദേഹങ്ങൾ മെഹ്റാം ഹാത്തിയ (51), വിഷ്ണു രാവൽ (27) എന്നിവരുടേതാണെന്ന് തിരിച്ചറിഞ്ഞിട്ടുണ്ട്.
മധ്യ ഗുജറാത്തിനെ സംസ്ഥാനത്തിന്റെ സൗരാഷ്ട്ര മേഖലയുമായി ബന്ധിപ്പിക്കുന്ന ഗംഭീര-മുജ്പൂർ പാലത്തിന്റെ ഒരു സ്ലാബ് ബുധനാഴ്ച രാവിലെ 7 മണിയോടെയാണ് തകർന്നുവീണതെന്ന് അധികൃതർ അറിയിച്ചു. ഇതോടെ പാലത്തിലൂടെ കടന്നുപോയ വാഹനങ്ങൾ നദിയിലേക്ക് പതിക്കുകയായിരുന്നു.
രക്ഷപ്പെടുത്തിയ ഒമ്പത് പേരിൽ അഞ്ച് പേർക്ക് പരിക്കേറ്റു. ഇവരെ വഡോദരയിലെ എസ്എസ്ജി ആശുപത്രിയിൽ പ്രവേശിപ്പിച്ചു. പരിക്കേറ്റ ആരുടെയും നില ഗുരുതരമല്ലെന്നും ആനന്ദ് കൂട്ടിച്ചേർത്തു.
റോഡ്സ് ആൻഡ് ബിൽഡിംഗ്സ് വകുപ്പിലെ മുതിർന്ന ഉദ്യോഗസ്ഥർ ഉൾപ്പെടുന്ന ഒരു സംഘം ഉന്നതതല അന്വേഷണം നടത്താൻ വ്യാഴാഴ്ച പുലർച്ചെ ഇവിടെയെത്തിയതായി സർക്കാർ പത്രക്കുറിപ്പിൽ പറയുന്നു.
എൻഡിആർഎഫും മറ്റ് ഏജൻസികളും നദിയിൽ തിരച്ചിലും രക്ഷാപ്രവർത്തനവും നടത്തിവരികയാണ്. വഡോദര കളക്ടർ അനിൽ ധമേലിയ ഉൾപ്പെടെയുള്ള വിവിധ ഉദ്യോഗസ്ഥർ വ്യാഴാഴ്ച പുലർച്ചെ സംഭവസ്ഥലത്തെത്തി രക്ഷാപ്രവർത്തനം വിലയിരുത്തി. റവന്യൂ ഉദ്യോഗസ്ഥരും പോലീസ് സംഘവും രാത്രി ഇവിടെ തമ്പടിച്ചതായും പത്രക്കുറിപ്പിൽ പറയുന്നു.
With input from PTI.
