മൈറ്റോകോൺട്രിയൽ ഈവ്: മാനവരാശിയുടെ ജനിതക മാതാവ്.

മനുഷ്യവംശത്തിന്റെ ഉത്ഭവം തേടിയുള്ള ശാസ്ത്രീയ പര്യവേഷണം: മൈറ്റോകോൺട്രിയൽ ഈവ് എന്ന നിഗൂഢതയിലേക്ക്

1970-കളുടെ അവസാനം മുതൽ 1980-കളുടെ ആരംഭം വരെയുള്ള കാലഘട്ടത്തിലാണ് തന്മാത്രാ ഘടികാര (molecular clock) രീതികൾ ഉപയോഗിച്ചുള്ള ആദ്യകാല ഗവേഷണങ്ങൾ നടന്നത്. അലൻ വിൽസൺ, മാർക്ക് സ്റ്റോൺകിംഗ്, റെബേക്ക എൽ. കാൻ, വെസ്ലി ബ്രൗൺ എന്നിവർ ചേർന്ന് നടത്തിയ പഠനത്തിൽ മനുഷ്യരിലെ മൈറ്റോകോൺട്രിയൽ ഡിഎൻഎയിലെ (mtDNA) മ്യൂട്ടേഷൻ അപ്രതീക്ഷിതമായി വേഗത്തിലാണെന്ന് കണ്ടെത്തി. ഇത് ന്യൂക്ലിയർ ഡിഎൻഎയേക്കാൾ 5 മുതൽ 10 മടങ്ങ് വരെ വേഗത്തിലായിരുന്നു. 21 വ്യക്തികളിൽ നിന്നുള്ള വിവരങ്ങൾ ഉപയോഗിച്ച് 1980-ൽ ബ്രൗൺ നടത്തിയ പഠനത്തിൽ നമ്മുടെ ഈ പൊതു പൂർവ്വിക ഏകദേശം 1,80,000 വർഷങ്ങൾക്ക് മുമ്പ് ജീവിച്ചിരുന്നതായി കണക്കാക്കി. 1982-ൽ പ്രസിദ്ധീകരിച്ച ഒരു സ്ഥിതിവിവരക്കണക്ക് വിശകലനം, മനുഷ്യന്റെ ഉത്ഭവം ഏഷ്യയിലാണെന്ന വാദത്തെ തള്ളിക്കളയുകയും ആഫ്രിക്കയിലാണെന്ന സിദ്ധാന്തത്തിന് (Recent African Origin) വലിയ പിന്തുണ നൽകുകയും ചെയ്തു.

1985 ആയപ്പോഴേക്കും വിവിധ ജനവിഭാഗങ്ങളിൽ നിന്നുള്ള 145 സ്ത്രീകളുടെ മൈറ്റോകോൺട്രിയൽ ഡിഎൻഎ വിവരങ്ങൾ ശാസ്ത്രജ്ഞർക്ക് ലഭ്യമായി. നാൽപ്പതിലധികം തവണ പരിഷ്കരിച്ച ശേഷം ഈ ഗവേഷണ പ്രബന്ധം 1987 ജനുവരി 1-ന് ‘നേച്ചർ’ (Nature) മാസികയിൽ പ്രസിദ്ധീകരിച്ചു. നിലവിലുള്ള എല്ലാ മനുഷ്യരുടെയും മൈറ്റോകോൺട്രിയൽ ഡിഎൻഎ ആഫ്രിക്കയിലെ ഒരു പ്രത്യേക ജനവിഭാഗത്തിൽ നിന്നാണ് ഉത്ഭവിച്ചതെന്നും അത് ഏകദേശം 1.4 ലക്ഷം മുതൽ 2 ലക്ഷം വർഷങ്ങൾക്ക് മുമ്പാണെന്നും ഈ പഠനം നിഗമനത്തിലെത്തി. ‘ഈവ്’ എന്ന പേര് ഈ ഗവേഷകർ അവരുടെ പ്രബന്ധത്തിൽ ഉപയോഗിച്ചിരുന്നില്ലെങ്കിലും, പിന്നീട് മാധ്യമങ്ങളിലൂടെ ഈ പേര് ലോകപ്രശസ്തമായി. അലൻ വിൽസൺ ‘ലക്കി മദർ’ (Lucky Mother) എന്ന പേരാണ് ഇഷ്ടപ്പെട്ടതെങ്കിലും ജനങ്ങൾക്കിടയിൽ ‘മൈറ്റോകോൺട്രിയൽ ഈവ്’ എന്ന പേര് ഉറച്ചുപോയി.

മൈറ്റോകോൺട്രിയൽ ഈവിനെക്കുറിച്ച് പല തെറ്റിദ്ധാരണകളും നിലനിൽക്കുന്നുണ്ട്. അവരിൽ പ്രധാനപ്പെട്ടത് ഇവർ അക്കാലത്ത് ജീവിച്ചിരുന്ന ഏക സ്ത്രീയായിരുന്നു എന്നതാണ്. എന്നാൽ ആധുനിക മനുഷ്യരുടെ എണ്ണം പതിനായിരങ്ങളിൽ താഴെ പോയിട്ടില്ലെന്ന് ജനിതക പഠനങ്ങൾ വ്യക്തമാക്കുന്നു. അക്കാലത്ത് ജീവിച്ചിരുന്ന മറ്റ് സ്ത്രീകളുടെ വംശപരമ്പരകളും ഇന്ന് നിലനിൽക്കുന്നുണ്ടാകാം, പക്ഷേ അവ നേരിട്ടുള്ള മാതൃവഴിയിലൂടെ (unbroken female line) ആയിരിക്കില്ല എന്ന് മാത്രം. കൂടാതെ, പുരുഷന്മാരുടെ പൊതു പൂർവ്വികനായ ‘വൈ-ക്രോമസോമൽ ആദം’ (Y-chromosomal Adam) ഇതേ കാലഘട്ടത്തിൽ തന്നെ ജീവിച്ചിരുന്ന ആളാകണമെന്നില്ല. 2013-ലെ പഠനങ്ങൾ സൂചിപ്പിക്കുന്നത് ആദവും ഈവും വ്യത്യസ്ത കാലഘട്ടങ്ങളിലാണ് ജീവിച്ചിരുന്നത് എന്നാണ്. എങ്കിലും ലോകത്തിന്റെ ഏത് കോണിലുള്ള മനുഷ്യനായാലും അവരുടെ ജനിതക വേരുകൾ ആഫ്രിക്കയിലെ ഈ ആദിമാതാവിലേക്ക് ചെന്നെത്തുന്നു എന്നത് നമ്മെ ഒന്നിപ്പിക്കുന്ന വലിയൊരു സത്യമാണ്. (NM)

For more details: The Indian Messenger