വട്ടിയൂർക്കാവിൽ ആർ. ശ്രീലേഖ ബിജെപി സ്ഥാനാർത്ഥിയായേക്കും; ഉന്നത നേതാക്കൾ വീട്ടിലെത്തി ചർച്ച നടത്തി.

തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പിൽ വട്ടിയൂർക്കാവ് നിയസഭാ മണ്ഡലത്തിൽ ബിജെപി സ്ഥാനാർത്ഥിയായി മുൻ ഡിജിപി ആർ. ശ്രീലേഖ മത്സരിക്കുമെന്ന് ഏറെക്കുറെ ഉറപ്പായി. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ, ദേശീയ നിർവാഹകസമിതി അംഗം പി.കെ. കൃഷ്ണദാസ് എന്നിവർ ചൊവ്വാഴ്ച ശ്രീലേഖയുടെ വസതിയിലെത്തി ചർച്ച നടത്തി. പാർട്ടി ആവശ്യപ്പെട്ടാൽ മത്സരിക്കാൻ തയ്യാറാണെന്ന് ശ്രീലേഖ കഴിഞ്ഞ ദിവസം പരസ്യമായി പ്രഖ്യാപിച്ചിരുന്നു.

തനിക്കെതിരെ അടുത്തിടെ രജിസ്റ്റർ ചെയ്ത പോക്സോ കേസ് രാഷ്ട്രീയ പ്രേരിതമാണെന്നും ഇതിലൂടെ തനിക്ക് ജനപിന്തുണ വർധിക്കുകയാണ് ചെയ്തതെന്നും അവർ പറഞ്ഞു. നിലവിൽ തിരുവനന്തപുരം കോർപ്പറേഷനിലെ ശാസ്തമംഗലം വാർഡിനെ പ്രതിനിധീകരിക്കുന്ന കൗൺസിലർ കൂടിയാണ് ശ്രീലേഖ. വട്ടിയൂർക്കാവിൽ ശ്രീലേഖ എത്തുന്നതോടെ കെ. മുരളീധരൻ (കോൺഗ്രസ്), വി.കെ. പ്രശാന്ത് (സിപിഎം) എന്നിവരുൾപ്പെടുന്ന ശക്തമായ ത്രികോണ മത്സരത്തിനാകും മണ്ഡലം സാക്ഷ്യം വഹിക്കുക. “മാറാത്തത് ഇനി മാറും” എന്ന മുദ്രാവാക്യവുമായാണ് ബിജെപി ഇത്തവണ തിരഞ്ഞെടുപ്പിനെ നേരിടുന്നത്. (TNIE)

For more details: The Indian Messenger