നാസിക് ടിസിഎസ് മതംമാറ്റ വിവാദം: സാമ്പത്തിക പരാധീനതയുള്ളവരെ ലക്ഷ്യമിട്ട് വൻ ഗൂഢാലോചന; ഞെട്ടിക്കുന്ന വിവരങ്ങൾ പുറത്ത്.
നാസിക്: ഐടി ഭീമനായ ടാറ്റ കൺസൾട്ടൻസി സർവീസസിന്റെ (TCS) നാസിക് ശാഖയിൽ നടന്ന നിർബന്ധിത മതപരിവർത്തന ശ്രമങ്ങളെയും ലൈംഗികാതിക്രമങ്ങളെയും കുറിച്ചുള്ള അന്വേഷണത്തിൽ ഞെട്ടിക്കുന്ന വിവരങ്ങൾ പുറത്ത്. സാമ്പത്തിക പ്രൊഫൈലിംഗ്, മതനിന്ദ, സഹതാപം നടിച്ച് വിശ്വാസം നേടിയെടുക്കുന്ന എച്ച്ആർ മാനേജർ, ഘട്ടം ഘട്ടമായുള്ള തീവ്രവാദി വൽക്കരണം എന്നിവയടങ്ങുന്ന ക്രൂരമായ പ്രവർത്തനരീതിയാണ് (Modus Operandi) ഇവിടെ നടന്നതെന്ന് പോലീസ് കണ്ടെത്തി.
മുതിർന്ന ജീവനക്കാരും എച്ച്ആർ മാനേജരും അടങ്ങുന്ന കൃത്യമായ ഒരു ശൃംഖലയാണ് ഇതിന് പിന്നിൽ പ്രവർത്തിച്ചിരുന്നതെന്ന് പോലീസ് വൃത്തങ്ങൾ സൂചിപ്പിച്ചു. ട്രെയിനിംഗ് ടീമിൽ ഉള്ളവരായിരുന്നു പ്രതികൾ. പുതിയതായി ജോലിയിൽ പ്രവേശിക്കുന്നവരുടെ വിശദമായ വിവരങ്ങൾ ഇവർ ശേഖരിച്ചിരുന്നു. ഇതിൽ നിന്ന് സാമ്പത്തികമായി പിന്നോക്കം നിൽക്കുന്നവരെയും കുടുംബപ്രശ്നങ്ങൾ ഉള്ളവരെയും പണത്തിന് അത്യാവശ്യമുള്ളവരെയുമാണ് ഇവർ ഇരകളായി തെരഞ്ഞെടുത്തിരുന്നത്.
പരിശീലനത്തിനിടെ ഹിന്ദു ദേവതകളെക്കുറിച്ച് മോശം പരാമർശങ്ങൾ നടത്തുക എന്നതായിരുന്നു ആദ്യ ഘട്ടം. ഇതുമൂലം വിഷമിച്ചിരിക്കുന്ന ഇരകളെ സമീപിച്ച് ആശ്വസിപ്പിക്കുകയും അവരുടെ വിശ്വാസം നേടിയെടുക്കുകയും ചെയ്യുക എന്നതായിരുന്നു പ്രതിപ്പട്ടികയിലുള്ള എച്ച്ആർ മാനേജർ നിദാ ഖാന്റെ ചുമതല. പതുക്കെ പതുക്കെ ഇരകളുടെ വസ്ത്രധാരണ രീതിയിലും ജീവിതശൈലിയിലും മാറ്റം വരുത്താൻ ഇവർ സമ്മർദ്ദം ചെലുത്തും. ഇത്തരം പ്രലോഭനങ്ങളിൽ വീണ ഒരു യുവതി തന്റെ വീട്ടിലെ ദൈവങ്ങളുടെ ചിത്രങ്ങൾ നീക്കം ചെയ്യുകയും കുടുംബവുമായി വഴക്കിടുകയും ചെയ്തതായി അന്വേഷണ ഉദ്യോഗസ്ഥർ പറഞ്ഞു. ആസിഫ് അൻസാരി, ഷാഫി ഷെയ്ഖ്, ഷാരൂഖ് ഖുറേഷി, റാസ മേമൻ, തൗസിഫ് അത്താർ എന്നിവരുൾപ്പെടെ ഏഴുപേർ നിലവിൽ കസ്റ്റഡിയിലാണ്.
അങ്ങേയറ്റം സാഹസികമായ ഒരു ഓപ്പറേഷനിലൂടെയാണ് പോലീസ് ഈ ഗൂഢാലോചന പുറത്തു കൊണ്ടുവന്നത്. ഹൗസ് കീപ്പിംഗ് സ്റ്റാഫ് എന്ന വ്യാജേന വനിതാ കോൺസ്റ്റബിൾമാർ ഓഫീസിനുള്ളിൽ പ്രവേശിച്ച് നിരീക്ഷണം നടത്തി. പുറം കരാർ നൽകുന്ന വിഭാഗമായതിനാൽ പ്രതികൾക്ക് സംശയം തോന്നിയില്ല. ഏതാനും പുരുഷ പോലീസുകാരും വേഷം മാറി ഓഫീസിൽ എത്തിയിരുന്നു. ഉന്നയിക്കപ്പെട്ട ഞെട്ടിക്കുന്ന പരാതികൾ സത്യമാണെന്ന് ഉറപ്പുവരുത്തിയ ശേഷമാണ് പോലീസ് അറസ്റ്റ് നടപടികളിലേക്ക് കടന്നത്.
ടിസിഎസ് മതംമാറ്റ വിവാദത്തിൽ പ്രതികൾ ഇരകളെ കണ്ടെത്തുന്നതിനും പദ്ധതികൾ ആസൂത്രണം ചെയ്യുന്നതിനുമായി പ്രത്യേക വാട്സ്ആപ്പ് ഗ്രൂപ്പ് ഉപയോഗിച്ചിരുന്നതായി അന്വേഷണസംഘം കണ്ടെത്തി. ഈ ഗ്രൂപ്പിലൂടെയാണ് ആരെയാണ് ലക്ഷ്യമിടേണ്ടതെന്നും (Targets) അവർക്ക് മേൽ എങ്ങനെ സ്വാധീനം ചെലുത്തണമെന്നും പ്രതികൾ ചർച്ച ചെയ്തിരുന്നത്. തീവ്ര സ്വഭാവമുള്ള മതവിഷയങ്ങൾക്കും കമ്പനിക്കുള്ളിലെ രാഷ്ട്രീയത്തിനുമായിരുന്നു ഈ ഗ്രൂപ്പിൽ മുൻഗണന നൽകിയിരുന്നതെന്ന് പോലീസ് വൃത്തങ്ങൾ വെളിപ്പെടുത്തി.
സംഭവത്തിൽ ഉയർന്നുവന്ന ലൈംഗികാതിക്രമം, ലൈംഗിക പീഡനം എന്നീ ഗൗരവകരമായ പരാതികളും പ്രത്യേക അന്വേഷണ സംഘം (SIT) വിശദമായി പരിശോധിക്കുന്നുണ്ട്. മതംമാറ്റ ശ്രമങ്ങൾക്കൊപ്പം തന്നെ ജീവനക്കാരെ ലൈംഗികമായി ചൂഷണം ചെയ്യുന്ന രീതിയും പ്രതികൾ സ്വീകരിച്ചിരുന്നോ എന്നാണ് പോലീസ് ഇപ്പോൾ അന്വേഷിക്കുന്നത്. ഈ കേസിൽ കൂടുതൽ ഞെട്ടിക്കുന്ന വിവരങ്ങൾ വരും ദിവസങ്ങളിൽ പുറത്തുവരുമെന്നാണ് സൂചന. (NDTV)
For more details: The Indian Messenger
