പടിഞ്ഞാറേക്കല്ലടയിൽ കല്യാണവീടിന് നേരെ ഗുണ്ടാ ആക്രമണം: വ്യാപക നാശനഷ്ടം, രണ്ടുപേർക്ക് പരിക്ക്.
ശാസ്താംകോട്ട പടിഞ്ഞാറേക്കല്ലട വിട്ടുവാതുക്കൽ ഭാഗത്ത് കല്യാണവീടിന് നേരെ എട്ടംഗ സംഘം നടത്തിയ അതിക്രമം നാടിനെ ഭീതിയിലാഴ്ത്തി. ബൈക്കിൽ വരികയായിരുന്ന സഹോദരങ്ങളെ ഒരു സംഘം യുവാക്കൾ തടഞ്ഞുനിർത്തി മർദ്ദിച്ചതോടെയാണ് സംഭവങ്ങളുടെ തുടക്കം. മർദ്ദനമേറ്റവർ സമീപത്തെ കല്യാണവീട്ടിലേക്ക് ഓടിക്കയറിയതോടെ അക്രമിസംഘം വീടിനുള്ളിൽ അതിക്രമിച്ചു കയറി കണ്ണിൽ കണ്ടതെല്ലാം തല്ലിത്തകർക്കുകയായിരുന്നു. രാത്രി പതിനൊന്നോടെ നടന്ന ഈ സംഭവത്തിൽ പ്രദേശത്താകെ വലിയ പരിഭ്രാന്തി പടർന്നു.
വാഹനങ്ങളുടെ അമിതവേഗത ചോദ്യം ചെയ്തതാണ് സംഘത്തെ പ്രകോപിപ്പിച്ചത്. ഇരുമ്പ് വടിയും ഹെൽമറ്റും ഉപയോഗിച്ചുള്ള മർദ്ദനത്തിൽ ശ്യാം രാജ്, ബിനു എന്നിവർക്ക് തലയ്ക്ക് ഗുരുതരമായി പരിക്കേറ്റു. ഇവർ നിലവിൽ തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലാണ്. കോട്ടക്കുഴി മുക്കിന് സമീപമുള്ള കല്യാണവീടിന് മുന്നിൽ പാർക്ക് ചെയ്തിരുന്ന ബൈക്കുകളും കാറുകളുടെ ചില്ലുകളും സംഘം അടിച്ചുതകർത്തു. ഒരു മണിക്കൂറോളം നീണ്ടുനിന്ന അക്രമം തടയാനാകാതെ സ്ത്രീകളും കുട്ടികളും ഉൾപ്പെടെയുള്ളവർ ഓടി രക്ഷപ്പെട്ടു. യാതൊരു പ്രകോപനവുമില്ലാതെയാണ് ആക്രമണമെന്നും പരിക്കേറ്റവരുടെ മൊഴിയുടെ അടിസ്ഥാനത്തിൽ അന്വേഷണം ആരംഭിച്ചതായും പോലീസ് അറിയിച്ചു.
With input from KN
For more details: The Indian Messenger
