‘എൽഡിഎഫ് മൂന്നാം ഊഴത്തിലേക്ക്’; വിജയിക്കേണ്ട പക്ഷം ഇടതുപക്ഷമെന്ന് ബിനോയ് വിശ്വം.
തിരുവനന്തപുരം: കേരളത്തിൽ എൽഡിഎഫ് ഭരണത്തിന് മൂന്നാം ഊഴമുണ്ടാകുമെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. വോട്ടെടുപ്പ് ദിനത്തിൽ പോളിംഗ് ബൂത്തുകളിൽ അനുഭവപ്പെടുന്ന വലിയ തിരക്ക് എൽഡിഎഫിന്റെ വിജയത്തിനായുള്ള ജനങ്ങളുടെ മുന്നേറ്റമാണെന്ന് അദ്ദേഹം പറഞ്ഞു. ജനങ്ങൾ എൽഡിഎഫിന്റെ പത്ത് വർഷത്തെ മികച്ച ഭരണം നേരിൽ കണ്ടവരാണെന്നും വിജയിക്കേണ്ട പക്ഷം ഇടതുപക്ഷമാണെന്നും അദ്ദേഹം കൂട്ടിച്ചേർത്തു.
ബിജെപിയെയും അവരുടെ കൂട്ടാളിയായി മാറിയ കോൺഗ്രസിനെയും പരാജയപ്പെടുത്തിയാൽ മാത്രമേ നാടിന് മുന്നോട്ട് പോകാൻ കഴിയൂ എന്ന് കേരളീയർക്ക് ബോധ്യമുണ്ടെന്ന് ബിനോയ് വിശ്വം പറഞ്ഞു. പ്രായഭേദമന്യേ എല്ലാ വിഭാഗം ജനങ്ങളും ഇത്തവണ ജനപക്ഷമായ എൽഡിഎഫിന് വോട്ട് ചെയ്യും. കരുതലിന്റെ പക്ഷമായ ഇടതുമുന്നണിക്ക് ജനങ്ങൾ നൽകുന്ന പിന്തുണ ചരിത്രവിജയമായി മാറുമെന്നും അദ്ദേഹം അവകാശപ്പെട്ടു.
തിരഞ്ഞെടുപ്പിൽ എൽഡിഎഫ് വലിയ വിജയം നേടുമെന്ന് മുഖ്യമന്ത്രി പിണറായി വിജയനും ആത്മവിശ്വാസം പ്രകടിപ്പിച്ചു. കേരളത്തിന്റെ ഭാവി നിർണയിക്കുന്ന അതിപ്രധാനമായ തിരഞ്ഞെടുപ്പാണിതെന്ന് അദ്ദേഹം പറഞ്ഞു. 2021-ൽ ലഭിച്ചതിനേക്കാൾ കൂടുതൽ സീറ്റുകൾ ഇത്തവണ എൽഡിഎഫിന് ലഭിക്കുമെന്നും ഭരണത്തുടർച്ച ഉറപ്പാണെന്നും മുഖ്യമന്ത്രി കൂട്ടിച്ചേർത്തു. (Kerala News)
For more details: The Indian Messenger
