‘ശത്രുതയുടെ പാത വെടിഞ്ഞ് അനുരഞ്ജനത്തിന്റെ പാത സ്വീകരിക്കണം’; സമാധാനത്തിന് ആഹ്വാനം ചെയ്ത് ലിയോ പതിനാലാമൻ മാർപാപ്പ.

വത്തിക്കാൻ സിറ്റി: ലോകമെമ്പാടുമുള്ള വിശ്വാസികൾക്ക് ഈസ്റ്റർ സന്ദേശം നൽകിക്കൊണ്ട്, ശത്രുതയുടെ പാത വെടിഞ്ഞ് അനുരഞ്ജനത്തിന്റെയും സമാധാനത്തിന്റെയും പാത സ്വീകരിക്കാൻ ലിയോ പതിനാലാമൻ മാർപാപ്പ ആഹ്വാനം ചെയ്തു. സെന്റ് പീറ്റേഴ്‌സ് ബസലിക്കയിൽ നടന്ന ഈസ്റ്റർ ശുശ്രൂഷകൾക്കിടെയാണ് അദ്ദേഹം ലോകത്തോട് ഈ നിർണ്ണായക സന്ദേശം പങ്കുവെച്ചത്.

അവിശ്വാസം, ഭയം, സ്വാർത്ഥത, കോപം തുടങ്ങിയ വികാരങ്ങൾ യുദ്ധങ്ങളിലൂടെയും അനീതിയിലൂടെയും രാജ്യങ്ങളെയും മനുഷ്യരെയും തമ്മിൽ വേർപെടുത്തുകയും ഒറ്റപ്പെടുത്തുകയും ചെയ്യുന്നുവെന്ന് മാർപാപ്പ ഓർമ്മിപ്പിച്ചു. നൈരാശ്യത്തിന് വഴിപ്പെടാതെ ഐക്യത്തിന്റെയും സമാധാനത്തിന്റെയും ഈസ്റ്റർ സമ്മാനങ്ങൾ ലോകമെമ്പാടും വളരാൻ അനുവദിക്കണമെന്ന് അദ്ദേഹം ആവശ്യപ്പെട്ടു.

മനുഷ്യന് ഭൗതികമായ ശരീരത്തെ ഇല്ലാതാക്കാൻ സാധിച്ചേക്കുമെങ്കിലും, ദൈവത്തിന്റെ സ്നേഹമാകുന്ന ജീവൻ മരണത്തെപ്പോലും മറികടക്കുന്ന നിത്യജീവനാണെന്നും അതിനെ തടവിലാക്കാൻ ആർക്കും കഴിയില്ലെന്നും മാർപാപ്പ വ്യക്തമാക്കി. നിലവിലെ ആഗോള സംഘർഷങ്ങളെ പേരെടുത്ത് പരാമർശിച്ചില്ലെങ്കിലും, വിഭജനമുണ്ടാക്കുന്ന പാപത്തിന്റെ കാഠിന്യത്തോട് ദൈവം സ്നേഹത്തിന്റെ ശക്തിയാൽ പ്രതികരിക്കുമെന്നും അത് തകർന്നുപോയ ജീവിതങ്ങളെ പുനസ്ഥാപിക്കുമെന്നും അദ്ദേഹം പറഞ്ഞു. ഏത് തിന്മയേക്കാളും ശക്തമാണ് ദൈവസ്നേഹമെന്നും അദ്ദേഹം കൂട്ടിച്ചേർത്തു. (WN)

For more details: The Indian Messenger