ദുബായ് പാം ജുമൈറയിൽ രണ്ട് പുതിയ മേൽപ്പാലങ്ങൾ നിർമ്മിക്കുന്നു: ആർ.ടി.എയും ദുബായ് ഹോൾഡിംഗും കൈകോർക്കുന്നു.
ദുബായ്: പാം ജുമൈറയിൽ കാൽനടയാത്രക്കാരുടെ സുരക്ഷ ഉറപ്പാക്കുന്നതിനും ഗതാഗതക്കുരുക്ക് കുറയ്ക്കുന്നതിനുമായി രണ്ട് പുതിയ കാൽനട മേൽപ്പാലങ്ങളുടെ (Pedestrian Bridges) നിർമ്മാണം ആരംഭിച്ചതായി ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) അറിയിച്ചു. ദുബായ് ഹോൾഡിംഗ് കമ്മ്യൂണിറ്റി മാനേജ്‌മെന്റുമായി സഹകരിച്ചാണ് പദ്ധതി നടപ്പിലാക്കുന്നത്. പാം ജുമൈറയിലെ പാർപ്പിട, വിനോദസഞ്ചാര, വാണിജ്യ മേഖലകളെ തമ്മിൽ ബന്ധിപ്പിച്ച് ഗതാഗത സൗകര്യം വർദ്ധിപ്പിക്കുകയാണ് പദ്ധതിയുടെ പ്രധാന ലക്ഷ്യം.
പ്രധാന പദ്ധതികളുമായി റോഡ് ശൃംഖലകളെ സമന്വയിപ്പിക്കുന്ന ആർ.ടി.എയും ദുബായ് ഹോൾഡിംഗും തമ്മിലുള്ള തന്ത്രപ്രധാനമായ പങ്കാളിത്തത്തിന്റെ ഭാഗമാണിതെന്ന് ആർ.ടി.എ ട്രാഫിക് ആൻഡ് റോഡ്‌സ് ഏജൻസി സി.ഇ.ഒ ഹുസൈൻ അൽ ബന്ന പറഞ്ഞു. നിലവിലെയും ഭാവിയിലെയും വളർച്ചയ്ക്ക് അനുയോജ്യമായ ഗതാഗത പരിഹാരങ്ങൾ നൽകാനും സുരക്ഷിതത്വം വർദ്ധിപ്പിക്കാനും സുസ്ഥിര നഗര വികസനത്തിന് പിന്തുണ നൽകാനും ഈ സഹകരണം സഹായിക്കുമെന്ന് അദ്ദേഹം കൂട്ടിച്ചേർത്തു.
താമസക്കാരുടെയും സന്ദർശകരുടെയും ആവശ്യങ്ങൾ കണ്ടറിഞ്ഞ് ദീർഘകാല കാഴ്ചപ്പാടോടെയാണ് അടിസ്ഥാന സൗകര്യ വികസനങ്ങൾ നടപ്പിലാക്കുന്നതെന്ന് ദുബായ് ഹോൾഡിംഗ് കമ്മ്യൂണിറ്റി മാനേജ്‌മെന്റ് സി.ഇ.ഒ ഫ്രാൻസിസ് ജിയാനി പറഞ്ഞു. പുതിയ പാലങ്ങൾ പാം ജുമൈറയിലുടനീളമുള്ള സഞ്ചാരം എളുപ്പമാക്കുമെന്നും കാൽനടയാത്രക്കാരുടെ സുരക്ഷയും സുഗമമായ വാഹന ഗതാഗതവും ഉറപ്പാക്കുമെന്നും അദ്ദേഹം വ്യക്തമാക്കി.
പാം ജുമൈറയുടെ പ്രവേശന കവാടത്തിലുള്ള ഷോർലൈനിന് (Shoreline) സമീപമാണ് ആദ്യ പാലം വരുന്നത്; റീട്ടെയിൽ കേന്ദ്രങ്ങൾക്ക് സമീപമുള്ള ഗോൾഡൻ മൈലിലാണ് (Golden Mile) രണ്ടാമത്തെ പാലം പണിയുന്നത്. പ്രദേശത്തെ 16,000-ത്തോളം താമസക്കാർക്ക് പുതിയ പാലങ്ങൾ പ്രയോജനം ചെയ്യും. ജംഗ്ഷനുകളിൽ വാഹനങ്ങൾ കാത്തുകിടക്കുന്ന സമയം 50 ശതമാനം വരെ കുറയ്ക്കാനും യാത്രാസമയം ലാഭിക്കാനും ഈ പദ്ധതിയിലൂടെ സാധിക്കും.
2026 ആകുമ്പോഴേക്കും റോഡപകട മരണങ്ങൾ പൂജ്യത്തിലെത്തിക്കുക എന്ന ലക്ഷ്യത്തോടെയുള്ള ‘ദുബായ് ട്രാഫിക് സേഫ്റ്റി സ്ട്രാറ്റജിക്ക്’ ഈ പദ്ധതി വലിയ പിന്തുണ നൽകും. 2007-നും 2025-നും ഇടയിൽ ദുബായിൽ കാൽനടയാത്രക്കാരുടെ അപകടമരണ നിരക്കിൽ 98 ശതമാനം കുറവുണ്ടായിട്ടുണ്ട്. 2006-ൽ കേവലം 26 കാൽനട മേൽപ്പാലങ്ങളും അടിപ്പാതകളും മാത്രമുണ്ടായിരുന്ന ദുബായിൽ 2025 അവസാനത്തോടെ അവയുടെ എണ്ണം 178 ആയി ഉയർന്നു. 585 ശതമാനത്തിന്റെ വർദ്ധനവാണിത്.
മണിക്കൂറിൽ 2,700 കാൽനടയാത്രക്കാരെ ഉൾക്കൊള്ളാൻ ശേഷിയുള്ളതാണ് ഈ രണ്ട് പാലങ്ങളും. നിലവിലെ യാത്രക്കാരുടെ എണ്ണത്തേക്കാൾ വളരെ കൂടുതലാണിത്; പാം ജുമൈറയിലെ ഭാവി വികസനങ്ങളും ടൂറിസം വളർച്ചയും കണക്കിലെടുത്താണ് ഈ ശേഷി നിശ്ചയിച്ചിരിക്കുന്നത്.
ഷോർലൈനിലെ ആദ്യ പാലത്തിന്റെ നിർമ്മാണം 2027 ജൂണിലും, ഗോൾഡൻ മൈലിലെ രണ്ടാമത്തെ പാലം 2027 ഒക്ടോബറിലും പൂർത്തിയാകും. നിർമ്മാണ സമയത്ത് വാഹനഗതാഗതത്തിന് തടസ്സമുണ്ടാകാതിരിക്കാൻ പ്രത്യേക ട്രാഫിക് ഡൈവേർഷനുകൾ ഏർപ്പെടുത്തും.
40 മീറ്റർ നീളത്തിലാണ് ഓരോ പാലവും നിർമ്മിക്കുന്നത്. മുതിർന്ന പൗരന്മാർക്കും നിശ്ചയദാർഢ്യമുള്ളവർക്കും (People of Determination – ഭിന്നശേഷിക്കാർ) എളുപ്പത്തിൽ ഉപയോഗിക്കാനാവുന്ന രീതിയിൽ ലിഫ്റ്റുകൾ അടക്കമുള്ള അത്യാധുനിക സൗകര്യങ്ങളോടെയാണ് ഇവ രൂപകൽപ്പന ചെയ്യുന്നത്. പാം ജുമൈറയുടെ തനതായ നഗര ഭംഗിക്ക് അനുയോജ്യമായ രീതിയിലായിരിക്കും ഇവയുടെ വാസ്തുവിദ്യ.
ദുബായ് ഹോൾഡിംഗിന് കീഴിലുള്ള പാം ജുമൈറ ഉൾപ്പെടെയുള്ള 15 പ്രമുഖ മേഖലകളിലെ റോഡ് ശൃംഖലകളും ഗതാഗത സൗകര്യങ്ങളും നവീകരിക്കുന്നതിനായി 2025 മാർച്ച് മാസത്തിൽ ആർ.ടി.എയും ദുബായ് ഹോൾഡിംഗും തമ്മിൽ ഒപ്പുവെച്ച കരാറിന്റെ ഭാഗമായാണ് ഈ നിർമ്മാണം നടക്കുന്നത്.
മേൽപ്പാലങ്ങൾക്ക് പുറമേ, പാം ജുമൈറയിലെ ആറിടങ്ങളിൽ അധിക അക്സിലറേഷൻ, ഡിസെലറേഷൻ ലെയ്നുകളും സ്ഥാപിക്കും. പൊതു-സ്വകാര്യ മേഖലകൾ തമ്മിലുള്ള വിജയകരമായ കൂട്ടായ്മയ്ക്ക് മികച്ച ഉദാഹരണമാണ് ഈ പദ്ധതിയെന്ന് അധികൃതർ ചൂണ്ടിക്കാട്ടി.
For more details: The Indian Messenger
