'ദ കേരള സ്റ്റോറി 2' സർട്ടിഫിക്കറ്റ് റദ്ദാക്കണമെന്ന് ഹർജി; നിർമ്മാതാക്കൾക്കും സെൻസർ ബോർഡിനും ഹൈക്കോടതി നോട്ടീസ്.

കൊച്ചി: വിവാദമായ ‘ദ കേരള സ്റ്റോറി 2 – ഗോസ് ബിയോണ്ട്’ എന്ന ചിത്രത്തിന്റെ സെൻസർ സർട്ടിഫിക്കറ്റ് റദ്ദാക്കണമെന്ന് ആവശ്യപ്പെട്ടുള്ള ഹർജിയിൽ ഹൈക്കോടതി നോട്ടീസ് അയച്ചു. കണ്ണൂർ കണ്ണവം സ്വദേശിയായ ശ്രീദേവ് നമ്പൂതിരി നൽകിയ ഹർജി പരിഗണിച്ചാണ് ജസ്റ്റിസ് ബെച്ചു കുര്യൻ തോമസിന്റെ ബെഞ്ച് കേന്ദ്ര സർക്കാരിനും സെൻസർ ബോർഡിനും നിർമ്മാതാവായ വിപുൽ അമൃത്‌ലാൽ ഷായ്ക്കും നോട്ടീസ് അയച്ചത്. ചിത്രത്തിന്റെ തലക്കെട്ട് പുനഃപരിശോധിക്കണമെന്നും നിയമപരമായ ചട്ടങ്ങൾ പാലിക്കാതെയാണ് സർട്ടിഫിക്കറ്റ് നൽകിയതെന്നും ഹർജിയിൽ ആരോപിക്കുന്നു.

മറ്റ് സംസ്ഥാനങ്ങളിലെ സംഭവങ്ങൾ ഉൾപ്പെടുത്തിയിട്ടും സിനിമയ്ക്ക് ‘ദ കേരള സ്റ്റോറി’ എന്ന് പേരിടുന്നത് കേരളത്തെ തീവ്രവാദ കേന്ദ്രമായി മുദ്രകുത്താനുള്ള ശ്രമമാണെന്ന് ഹർജിയിൽ പറയുന്നു. ട്രെയിലറിലെ ഡയലോഗുകൾ മതസ്പർദ്ധ വളർത്താൻ കാരണമാകുമെന്നും ഹർജിക്കാരൻ ചൂണ്ടിക്കാട്ടി. ഫെബ്രുവരി 27-ന് ചിത്രം റിലീസ് ചെയ്യാനിരിക്കെ, കേസ് ഫെബ്രുവരി 24-ന് കോടതി വീണ്ടും പരിഗണിക്കും. (TNIE)

For more details: The Indian Messenger