ബംഗ്ലാദേശ് മുൻ പ്രധാനമന്ത്രി ഖാലിദ സിയ അന്തരിച്ചു.

ധാക്ക: ബംഗ്ലാദേശിന്റെ ആദ്യ വനിതാ പ്രധാനമന്ത്രിയും മുൻ ഭരണാധികാരി ഷെയ്ഖ് ഹസീനയുടെ രാഷ്ട്രീയ എതിരാളിയുമായ ഖാലിദ സിയ (80) അന്തരിച്ചു. ചൊവ്വാഴ്ചയാണ് ബംഗ്ലാദേശ് നാഷണലിസ്റ്റ് പാർട്ടി (ബിഎൻപി) ഖാലിദ സിയയുടെ വിയോഗ വാർത്ത പുറത്തുവിട്ടത്. ദീർഘകാലമായി അസുഖബാധിതയായിരുന്നു.

അഴിമതിക്കേസുകളിൽപ്പെട്ട് ജയിൽശിക്ഷ അനുഭവിച്ചിരുന്ന സിയയെ 2025 ജനുവരിയിൽ സുപ്രീം കോടതി കുറ്റവിമുക്തയാക്കിയിരുന്നു. ഇതോടെ ഫെബ്രുവരിയിൽ നടക്കാനിരുന്ന പൊതുതിരഞ്ഞെടുപ്പിൽ മത്സരിക്കാൻ അവർക്ക് വഴിതെളിഞ്ഞു. മുൻ പ്രധാനമന്ത്രി ഷെയ്ഖ് ഹസീനയുടെ ഭരണകാലത്ത് ചികിത്സയ്ക്കായി വിദേശത്ത് പോകാൻ സിയയുടെ കുടുംബം പലതവണ അപേക്ഷിച്ചെങ്കിലും ഹസീന സർക്കാർ അത് നിരസിച്ചിരുന്നു. എന്നാൽ 2024-ൽ ഹസീന പുറത്തായതിന് പിന്നാലെ വന്ന മുഹമ്മദ് യൂനസിന്റെ നേതൃത്വത്തിലുള്ള ഇടക്കാല സർക്കാർ സിയയെ ലണ്ടനിൽ ചികിത്സയ്ക്ക് പോകാൻ അനുവദിച്ചു.

ബംഗ്ലാദേശ് മുൻ പ്രസിഡന്റ് സിയാവുർ റഹ്മാന്റെ പത്നിയായ ഖാലിദ സിയ, അദ്ദേഹത്തിന്റെ മരണശേഷമാണ് സജീവ രാഷ്ട്രീയത്തിലേക്ക് വന്നത്. 1990-കളിൽ സൈനിക സ്വേച്ഛാധിപത്യത്തിനെതിരെ അവർ നടത്തിയ പോരാട്ടം ബംഗ്ലാദേശ് രാഷ്ട്രീയത്തിൽ വലിയ മാറ്റങ്ങൾ കൊണ്ടുവന്നു. 1991-ലാണ് അവർ ആദ്യമായി പ്രധാനമന്ത്രി പദത്തിലെത്തിയത്. ബംഗ്ലാദേശിന്റെ രാഷ്ട്രീയ ചരിത്രത്തെ ഒരു തലമുറയോളം സ്വാധീനിച്ച വ്യക്തിത്വമായിരുന്നു ഖാലിദ സിയ. (TNIE)

For more details: The Indian Messenger