ഇറാന്റെ അടുത്ത പരമോന്നത നേതാവിനെ കണ്ടെത്താൻ ഐ.ആർ.ജി.സിയുടെ അടിയന്തര നീക്കം.

ടെഹ്‌റാൻ: ഇസ്രായേൽ-യുഎസ് വ്യോമാക്രമണത്തിൽ പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ടതായി റിപ്പോർട്ടുകൾ പുറത്തുവന്നതിന് പിന്നാലെ, ഇറാന്റെ അടുത്ത ഭരണാധികാരിയെ നിയമപരമായ നടപടിക്രമങ്ങൾ മറികടന്ന് നിശ്ചയിക്കാൻ ഇസ്‌ലാമിക് റെവല്യൂഷണറി ഗാർഡ് കോർപ്സ് (IRGC) നീക്കം നടത്തുന്നതായി റിപ്പോർട്ട്. ഞായറാഴ്ച (മാർച്ച് 1) പുലർച്ചയോടെ തന്നെ ഇക്കാര്യത്തിൽ അന്തിമ തീരുമാനമെടുക്കാനാണ് ഐ.ആർ.ജി.സിയുടെ ശ്രമമെന്ന് ‘ഇറാൻ ഇന്റർനാഷണൽ’ റിപ്പോർട്ട് ചെയ്തു.

വ്യോമാക്രമണങ്ങൾ തുടരുന്നതിനാൽ പുതിയ നേതാവിനെ തിരഞ്ഞെടുക്കേണ്ട ഭരണഘടനാപരമായ സമിതിയായ ‘അസംബ്ലി ഓഫ് എക്സ്പെർട്‌സ്’ (Assembly of Experts) വിളിച്ചുചേർക്കുന്നത് അസാധ്യമാണെന്ന് ഐ.ആർ.ജി.സി നേതൃത്വം കരുതുന്നു. ഇതിനാൽ നിയമങ്ങൾ പാലിക്കാതെ തന്നെ പുതിയ നേതാവിനെ പ്രഖ്യാപിക്കാനാണ് സൈനിക നേതൃത്വത്തിന്റെ സമ്മർദ്ദം.

നിലവിൽ ഇറാൻ ഭരണകൂടത്തിലും സൈനിക തലപ്പത്തും വൻ ആശയക്കുഴപ്പം നിലനിൽക്കുന്നതായി സൂചനയുണ്ട്. ഉത്തരവുകൾ കൈമാറുന്നതിലും ഏകോപിപ്പിക്കുന്നതിലും തടസ്സങ്ങൾ നേരിടുന്നുണ്ട്. തുടർച്ചയായ ആക്രമണങ്ങൾ ഭയന്ന് പല സൈനിക ഉദ്യോഗസ്ഥരും റിപ്പോർട്ട് ചെയ്യുന്നില്ലെന്നും റിപ്പോർട്ടുകളുണ്ട്. ഞായറാഴ്ച നേരം പുലരുന്നതോടെ ജനങ്ങൾ തെരുവിലിറങ്ങി പ്രതിഷേധിക്കുമോ എന്ന ആശങ്കയും ഐ.ആർ.ജി.സിക്കുണ്ട്. (Iranintl) https://www.iranintl.com/en/liveblog/202602288143#202602285944

For more details: The Indian Messenger