ഇസ്രായേലിൽ മോദിക്ക് ചരിത്ര സ്വീകരണം; ലോകം ഉറ്റുനോക്കിയ യാത്ര, നെസെറ്റിൽ ഇന്ന് ചരിത്ര പ്രസംഗം.

ടെൽ അവീവ്: രണ്ട് ദിവസത്തെ ഔദ്യോഗിക സന്ദർശനത്തിനായി ഇസ്രായേലിലെത്തിയ ഇന്ത്യൻ പ്രധാനമന്ത്രി നരേന്ദ്ര മോദിക്ക് വൻ സ്വീകരണം. ബെൻ ഗുരിയൻ വിമാനത്താവളത്തിൽ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു നേരിട്ടെത്തിയാണ് മോദിയെ സ്വീകരിച്ചത്. സാധാരണയായി അമേരിക്കൻ പ്രസിഡന്റിനോ മാർപ്പാപ്പയ്ക്കോ മാത്രം നൽകാറുള്ള അതീവ പ്രാധാന്യത്തോടെയുള്ള വരവേൽപ്പാണ് ഇന്ത്യൻ പ്രധാനമന്ത്രിക്ക് ഇസ്രായേൽ നൽകിയത്.

“എന്റെ സുഹൃത്തേ, ഇസ്രായേലിലേക്ക് സ്വാഗതം” എന്ന് നെതന്യാഹു മോദിയെ ആലിംഗനം ചെയ്തുകൊണ്ട് സ്വാഗതം ചെയ്തു. തുടർന്ന് നടന്ന ഗാർഡ് ഓഫ് ഓണർ ചടങ്ങിലും മറ്റ് ഔദ്യോഗിക പരിപാടികളിലും ഇരു നേതാക്കളും തമ്മിലുള്ള ആത്മബന്ധം പ്രകടമായിരുന്നു. സന്ദർശനത്തിന്റെ ഭാഗമായി പ്രധാനമന്ത്രി ഇസ്രായേൽ പാർലമെന്റായ നെസെറ്റിനെ (Knesset) അഭിസംബോധന ചെയ്യും. പ്രതിരോധം, കൃഷി, ജലസംരക്ഷണം, സൈബർ സുരക്ഷ തുടങ്ങിയ മേഖലകളിൽ നിർണ്ണായകമായ പല കരാറുകളിലും ഇരു രാജ്യങ്ങളും ഒപ്പുവെക്കുമെന്നാണ് പ്രതീക്ഷിക്കുന്നത്.

രണ്ട് ദിവസത്തെ ഔദ്യോഗിക സന്ദർശനത്തിനായി പ്രധാനമന്ത്രി നരേന്ദ്ര മോദി ഇസ്രായേലിലെത്തി. ഇന്ത്യൻ സമയം വൈകുന്നേരം 4:15-ഓടെ ടെൽ അവീവിലെ ബെൻ ഗുരിയൻ വിമാനത്താവളത്തിൽ ഇറങ്ങിയ പ്രധാനമന്ത്രിയെ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു നേരിട്ടെത്തി സ്വീകരിച്ചു. പത്ത് വർഷത്തെ ഭരണത്തിനിടയിൽ മോദി നടത്തുന്ന രണ്ടാമത്തെ ഇസ്രായേൽ സന്ദർശനമാണിത്.

ബുധനാഴ്ച രാവിലെ 9 മണിക്ക് ഡൽഹിയിൽ നിന്ന് പുറപ്പെട്ട പ്രധാനമന്ത്രിയുടെ വിമാനം ആറ് മണിക്കൂർ നീണ്ട യാത്രയ്ക്കൊടുവിലാണ് ഇസ്രായേലിൽ എത്തിയത്. ഫ്ലൈറ്റ് റഡാർ 24 (FlightRadar24) പ്രകാരം ബുധനാഴ്ച ലോകത്ത് ഏറ്റവും കൂടുതൽ പേർ ഓൺലൈനായി ട്രാക്ക് ചെയ്ത വിമാനയാത്ര ഇതായിരുന്നു. ഇസ്രായേൽ പാർലമെന്റായ ‘നെസെറ്റിനെ’ (Knesset) അഭിസംബോധന ചെയ്യുന്ന ആദ്യ ഇന്ത്യൻ പ്രധാനമന്ത്രി എന്ന ചരിത്ര നേട്ടവും ഈ സന്ദർശനത്തിലൂടെ മോദി സ്വന്തമാക്കും. ശാസ്ത്രം, സാങ്കേതികവിദ്യ, പ്രതിരോധം, ജല മാനേജ്‌മെന്റ് തുടങ്ങിയ മേഖലകളിൽ ഇരു രാജ്യങ്ങളും തമ്മിലുള്ള തന്ത്രപ്രധാനമായ പങ്കാളിത്തം നേതാക്കൾ വിലയിരുത്തും.

പ്രധാനമന്ത്രിയുടെ ഇസ്രായേൽ സന്ദർശനത്തെ രൂക്ഷമായ ഭാഷയിലാണ് കോൺഗ്രസ് വിമർശിച്ചത്. ഗാസയിലെയും വെസ്റ്റ് ബാങ്കിലെയും പലസ്തീനികളുടെ ദുരവസ്ഥ അവഗണിച്ചാണ് മോദിയുടെ സന്ദർശനമെന്ന് കോൺഗ്രസ് ജനറൽ സെക്രട്ടറി ജയറാം രമേശ് കുറ്റപ്പെടുത്തി. പലസ്തീൻ ജനതയെ ഇന്ത്യ കൈവിട്ടതായും അദ്ദേഹം ആരോപിച്ചു. ഗാസയിലെ വംശഹത്യയെക്കുറിച്ച് മോദി ഇസ്രായേൽ പാർലമെന്റിൽ സംസാരിക്കണമെന്ന് പ്രിയങ്ക ഗാന്ധി ആവശ്യപ്പെട്ടു. ഇതിന് മറുപടിയായി ബി.ജെ.പി വക്താവ് ഗൗരവ് ഭാട്ടിയ പ്രിയങ്ക ഗാന്ധിക്കെതിരെ കടുത്ത പരിഹാസവുമായി രംഗത്തെത്തി. (HT)

For more details: The Indian Messenger