മന്ത്രിയുടെ ഉത്തരവിനും പുല്ലുവില; പേരൂർക്കട ഇഎസ്‌ഐയിൽ ഇന്നും ശസ്ത്രക്രിയ മുടങ്ങി; ഡോക്ടർമാർ തീയറ്ററിൽ നിന്ന് ഇറങ്ങിപ്പോയി, പൊറുതിമുട്ടി രോഗികൾ.

തിരുവനന്തപുരം: പേരൂർക്കട ഇഎസ്‌ഐ ആശുപത്രിയിൽ ഡോക്ടർമാരുടെ തമ്മിലടി മൂലം ഇന്നും ശസ്ത്രക്രിയകൾ മുടങ്ങി. രോഗിയെ ഓപ്പറേഷൻ തീയറ്ററിനുള്ളിൽ കിടത്തിയ ശേഷമാണ് അനസ്തേഷ്യ ഡോക്ടർമാർ ഇറങ്ങിപ്പോയത്. കഴിഞ്ഞ ദിവസം മുടങ്ങിയ ശസ്ത്രക്രിയകൾ ഇന്ന് നടത്തണമെന്ന് മന്ത്രി വി. ശിവൻകുട്ടി നിർദ്ദേശം നൽകിയിട്ടും അത് അവഗണിച്ചാണ് ഡോക്ടർമാരുടെ ഈ നടപടി. തൈറോയ്ഡ് ശസ്ത്രക്രിയയ്ക്കായി തീയറ്ററിൽ പ്രവേശിപ്പിച്ച ബിന്ദു എന്ന രോഗിയെ അവിടെ തുടരാൻ അനുവദിച്ചാണ് ഡോക്ടർമാർ പ്രതിഷേധിച്ചത്. അനസ്തേഷ്യ വിഭാഗത്തിലെ ഡോക്ടർമാരായ ബിനിലും പ്രിയയും സർജറി വിഭാഗത്തിലെ ഡോക്ടർ ഗണേഷും തമ്മിലുള്ള തർക്കമാണ് സാധാരണക്കാരായ രോഗികളെ ദുരിതത്തിലാക്കുന്നത്. കഴിഞ്ഞ ദിവസവും സമാനമായ രീതിയിൽ അഞ്ച് ശസ്ത്രക്രിയകൾ മുടങ്ങിയിരുന്നു. ആശുപത്രി സൂപ്രണ്ട് കുറ്റക്കാരായ ഡോക്ടർമാർക്കെതിരെ നടപടി ശുപാർശ ചെയ്ത് റിപ്പോർട്ട് നൽകിയിട്ടുണ്ട്. (Kerala News)

For more details: The Indian Messenger