അരീക്കര സുബ്രഹ്മണ്യൻ നമ്പൂതിരി ശബരിമല മേൽശാന്തി; എ. ദാമോദരൻ നമ്പൂതിരി മാളികപ്പുറം മേൽശാന്തി.
ശബരിമല ക്ഷേത്രത്തിലെ പുതിയ മേല്‍ശാന്തിയായി അരീക്കര സുബ്രഹ്‌മണ്യന്‍ ശങ്കരൻ നമ്പൂതിരിയെ തിരഞ്ഞെടുത്തു. തിരുവനന്തപുരം അരീക്കര സ്വദേശിയാണ് സുബ്രഹ്‌മണ്യന്‍ നമ്പൂതിരി. നിലവില്‍ പഴവങ്ങാടി ക്ഷേത്രത്തിലെ മേല്‍ശാന്തിയാണ്. പന്തളം നാലുകെട്ട് കൊട്ടാരത്തിലെ വി. അർജുനന്റെയും കോട്ടയം കാരാപ്പുഴ ഇളയകോവിലകത്ത്‌ ശർമദ ആർ. വർമയുടെയും മകനായ ദേവനന്ദനാണ് ശബരിമല മേൽശാന്തിയെ നറുക്കെടുപ്പിലൂടെ തിരഞ്ഞെടുത്തത്. മാളികപ്പുറം ക്ഷേത്രത്തിലെ മേൽശാന്തിയായി എ. ദാമോദരന്‍ നമ്പൂതിരിയെ തിരഞ്ഞെടുത്തു. കോഴിക്കോട് വടകര സ്വദേശിയാണ് ദാമോദരന്‍ നമ്പൂതിരി. തൃപ്പൂണിത്തുറ ലക്ഷ്‌മി വിലാസം പാലസിൽ മൈഥിലിരാജ- രഞ്‌ജിത്ത് രാജൻ ദമ്പതികളുടെ മകൾ അനശ്വരയാണ്‌ മാളികപ്പുറം മേൽശാന്തിയായി ദാമോദരന്‍ നമ്പൂതിരിയെ തിരഞ്ഞെടുത്തത്.
അതേസമയം, തുലാമാസ പൂജകള്‍ക്കായി ഇന്നലെയാണ് ശബരിമല നട തുറന്നത്. പതിറ്റാണ്ടുകള്‍ക്ക് ശേഷം മഹാനവമി, വിജയദശമി ദിനങ്ങളില്‍ ശബരിമല നട തുറക്കുന്നുവെന്ന പ്രത്യേകതയും ഇത്തവണത്തെ തുലാമാസ പൂജകള്‍ക്കുണ്ട്. പൂജ അവധി ദിനങ്ങൾ കൂടിയെത്തിയതോടെ തുലാമാസ പൂജകൾക്കായി വൻ ഭക്തജന തിരക്കാണ് പ്രതീക്ഷിക്കുന്നത്. തുലാമാസ പൂജകള്‍ പൂര്‍ത്തിയാക്കി ഒക്ടോബര്‍ 22ന് രാത്രി പത്തിന് നടയടക്കും. തുടര്‍ന്ന് അടുത്ത മാസം 17ന് മണ്ഡലകാലം ആരംഭിക്കും.
മണ്ഡല-മകരവിളക്ക് തീർത്ഥാടന മുന്നൊരുക്കങ്ങളുടെ അവലോകനത്തിനായി മുഖ്യമന്ത്രി വി.ഡി സതീശൻ ഇന്നലെ ശബരിമല സന്ദർശിച്ചിരുന്നു. തീർത്ഥാടകർക്ക് കൂടുതൽ സൗകര്യമൊരുക്കുന്നതിന്റെ ഭാഗമായി സന്നിധാനത്തെയും പമ്പയിലെയും ശൗചാലയ സംവിധാനങ്ങൾ ഇത്തവണ തിരുവിതാംകൂർ ദേവസ്വം ബോർഡ് സൗജന്യമാക്കിയിട്ടുണ്ട്. കൂടാതെ ഡ്യൂട്ടിയിലുള്ള പൊലീസുകാരുടെ മെസ്സ് ഗ്രാന്റും വർദ്ധിപ്പിച്ചിട്ടുണ്ട്. തിരക്ക് നിയന്ത്രിക്കുന്നതിനായി കൂടുതൽ പൊലീസ് സേനയെ സന്നിധാനത്തും പാതയോരങ്ങളിലും വിന്യസിക്കുന്നുണ്ട്.
For more details: The Indian Messenger
