സംവിധായകൻ ആർ. ശരത് അന്തരിച്ചു; വിടവാങ്ങിയത് ദേശീയ, സംസ്ഥാന പുരസ്കാരങ്ങൾ നേടിയ പ്രശസ്ത ചലച്ചിത്രകാരൻ.
കൊച്ചി: പ്രശസ്ത മലയാള ചലച്ചിത്ര സംവിധായകനും സാംസ്കാരിക പ്രവർത്തകനുമായ ആർ. ശരത് (63) അന്തരിച്ചു. തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്ത്യം. സായാഹ്നം, ശീലാബതി, സ്ഥിതി, ബുദ്ധൻ ചിരിക്കുന്നു തുടങ്ങി ശ്രദ്ധേയമായ നിരവധി ചിത്രങ്ങളുടെ സംവിധായകനാണ്. ഏഴ് സംസ്ഥാന പുരസ്കാരങ്ങൾ നേടിയ ‘സായാഹ്നം’ അദ്ദേഹത്തിന്റെ ശ്രദ്ധേയമായ സൃഷ്ടികളിലൊന്നാണ്.
ഡോക്യുമെന്ററി സംവിധായകനായി സിനിമാരംഗത്തേക്ക് എത്തിയ ആർ. ശരത്, ‘ദി പെയിന്റഡ് എപ്പിക്സ്’ എന്ന ഡോക്യുമെന്ററിയുടെ ചിത്രീകരണത്തിനിടെ രാജാ രവിവർമ്മയുടെ അപൂർവ്വവും പൊതുജനങ്ങൾക്ക് അപരിചിതവുമായ ചുവർചിത്രങ്ങൾ കണ്ടെത്തി ചരിത്രത്തിൽ ഇടംപിടിച്ചു. ചുമർചിത്ര ഗവേഷണത്തിന് 1996-ൽ കേന്ദ്ര സാംസ്കാരിക വകുപ്പിന്റെ ജൂനിയർ ഫെലോഷിപ്പും അദ്ദേഹത്തിന് ലഭിച്ചിട്ടുണ്ട്.
ഒ.എൻ.വി കുറുപ്പിന്റെ കവിതയെ ആസ്പദമാക്കി ഒരുക്കിയ ‘ഭൂമിക്ക് ഒരു ചരമഗീതം’ എന്ന ഹ്രസ്വചിത്രവും, ഗായകൻ ഉണ്ണി മേനോൻ നായകനായ ‘സ്ഥിതി’ എന്ന ചിത്രവും വലിയ നിരൂപക പ്രശംസ നേടി. ഒരു സംവിധായകന്റെ മികച്ച നവാഗത ചിത്രത്തിനുള്ള ഇന്ദിരാഗാന്ധി അവാർഡ്, മികച്ച മലയാള ചിത്രത്തിനുള്ള ദേശീയ ചലച്ചിത്ര അവാർഡ്, മികച്ച ചിത്രത്തിനും കഥയ്ക്കുമുള്ള കേരള സംസ്ഥാന അവാർഡുകൾ തുടങ്ങി നിരവധി പുരസ്കാരങ്ങൾ നേടിയിട്ടുണ്ട്.
For more details: The Indian Messenger
