കത്താറ അന്താരാഷ്ട്ര വേട്ടയാടൽ, വേട്ടപ്പക്ഷി പ്രദർശനം ‘സുഹൈൽ 2026’ ഇന്ന് ആരംഭിക്കും.
പത്താമത് കത്താറ അന്താരാഷ്ട്ര വേട്ടയാടൽ, വേട്ടപ്പക്ഷി പ്രദർശനമായ ‘സുഹൈൽ 2026’ (S’hail 2026) ഇന്ന് കത്താറ കൾച്ചറൽ വില്ലേജിൽ ആരംഭിക്കും. സെപ്റ്റംബർ 12 വരെ അഞ്ച് ദിവസങ്ങളിലായി നടക്കുന്ന ഈ പ്രദർശനത്തിൽ 14 രാജ്യങ്ങളിൽ നിന്നായി 155 പ്രദർശകർ പങ്കെടുക്കുന്നുണ്ട്. ചരിത്രത്തിലെ ഏറ്റവും വലിയ അന്താരാഷ്ട്ര പങ്കാളിത്തമാണ് ഇത്തവണത്തേത്.
ഖത്തറിന് പുറമെ സൗദി അറേബ്യ, കുവൈറ്റ്, യു.എ.ഇ, ലെബനൻ, പാകിസ്ഥാൻ, തുർക്കി, പോളണ്ട്, ഫ്രാൻസ്, യുകെ, പോർച്ചുഗൽ, സ്പെയിൻ, റഷ്യ, ദക്ഷിണാഫ്രിക്ക എന്നീ രാജ്യങ്ങളാണ് ഇതിൽ പങ്കെടുക്കുന്നത്. ഗൾഫ് മേഖലയ്ക്ക് അപ്പുറത്തേക്ക് വ്യാപിച്ച് നടക്കുന്ന ഇത്തവണത്തെ പതിപ്പ് ഏറ്റവും വൈവിധ്യമാർന്ന ഒന്നായി മാറുകയാണ്.
വേട്ടപ്പക്ഷികൾ, വേട്ടയാടൽ ഉപകരണങ്ങൾ, ക്യാമ്പിംഗ് സാമഗ്രികൾ, അത്യാധുനിക ഫീൽഡ് സാങ്കേതികവിദ്യകൾ എന്നിവയുൾപ്പെടെയുള്ള ഉൽപ്പന്നങ്ങളും വിദഗ്ദ്ധ സേവനങ്ങളുമാണ് 155 കമ്പനികളും സ്ഥാപനങ്ങളും ഇവിടെ അവതരിപ്പിക്കുന്നത്.
വേട്ടയാടൽ, വേട്ടപ്പക്ഷി വളർത്തൽ, പാരമ്പര്യം, സംസ്കാരം, വാണിജ്യം, ടൂറിസം എന്നിവ ഒത്തുചേരുന്ന പ്രൊഫഷണൽ എക്സിബിഷനായി ‘സുഹൈൽ’ ഇന്ന് വളർന്നു കഴിഞ്ഞു. തനിമയും പാരമ്പര്യവും സംരക്ഷിച്ചു നിർത്തി വരുംതലമുറയ്ക്ക് കൈമാറുന്നതോടൊപ്പം, ആഗോള വിപണിയുടെ മാറ്റങ്ങൾ അവതരിപ്പിക്കാനും ഖത്തർ ഇതിലൂടെ ലക്ഷ്യമിടുന്നു.
സന്ദർശകർക്ക് പുതിയ ഉപകരണങ്ങൾ നേരിട്ട് പരിശോധിക്കാനും, വിവിധ പവലിയനുകളിലെ സാങ്കേതികവിദ്യകൾ താരതമ്യം ചെയ്യാനും, വേട്ടയാടൽ-ക്യാമ്പിംഗ് സാമഗ്രികളും വേട്ടപ്പക്ഷികളും അവിടെവെച്ച് തന്നെ വാങ്ങാനും സാധിക്കും.
പ്രദർശനത്തോടനുബന്ധിച്ച് പ്രധാനമായും വേട്ടപ്പക്ഷികളുടെ ലേലവും (Falcon Auction) സംഘടിപ്പിച്ചിട്ടുണ്ട്. കൂടാതെ ഏറ്റവും മികച്ച ഫാൽക്കൺ ഹൂഡ്, മികച്ച പവലിയൻ, മികച്ച ഗാരേജ്, ഫാൽക്കണെ പ്രകീർത്തിക്കുന്ന മികച്ച കവിത എന്നിവയ്ക്കുള്ള മത്സരങ്ങളും നടക്കും.
ആഴ്ചയിലുടനീളം തത്സമയ ചിത്രരചനയും ഉണ്ടായിരിക്കും. പ്രകൃതിദൃശ്യങ്ങളും വേട്ടയാടൽ രംഗങ്ങളും ചിത്രകാരന്മാർ കാണികളുടെ മുന്നിൽ വെച്ച് തത്സമയം വരയ്ക്കുന്നതിലൂടെ കരകൗശലവിദ്യയും പാരമ്പര്യവും ഒരുമിച്ച് അവതരിപ്പിക്കപ്പെടും.
സന്ദർശകർക്കും പങ്കാളികൾക്കുമായി മെട്രാഷ് (Metrash) ആപ്പ് വഴി പുതിയ സേവനങ്ങൾ സംഘാടക സമിതി പ്രഖ്യാപിച്ചിട്ടുണ്ട്. വേട്ടയാടൽ ആയുധ ലൈസൻസിനുള്ള അപേക്ഷകൾ ആപ്പ് വഴി സ്വീകരിക്കും. നിർദ്ദിഷ്ട നിയമങ്ങൾക്ക് വിധേയമായി പഴയ ആയുധങ്ങൾ നൽകി പുതിയവ വാങ്ങാനും, അംഗീകൃത മാനദണ്ഡങ്ങൾ പാലിച്ചുകൊണ്ട് പ്രദർശന സമയത്ത് വെടിയുണ്ടകൾ വാങ്ങാനും ഇതിലൂടെ സാധിക്കും. തിരക്ക് കുറയ്ക്കുന്നതിനും ഇടപാടുകൾ പൂർണ്ണമായും നിയമപരമായ ചട്ടക്കൂടിൽ നിലനിർത്തുന്നതിനുമാണ് ഈ നടപടികൾ.
സോഷ്യൽ ആൻഡ് സ്പോർട് കോൺട്രിബ്യൂഷൻ ഫണ്ടിന്റെയും (DAAM) മറ്റ് ദേശീയ സ്ഥാപനങ്ങളുടെയും പിന്തുണയോടെയാണ് ഈ പതിപ്പ് സംഘടിപ്പിക്കുന്നത്. പ്രാദേശികമായും അന്താരാഷ്ട്രതലത്തിലും മുൻനിര പ്ലാറ്റ്ഫോമുകളിലൊന്നായി സുഹൈലിനെ വളർത്താനും പാരമ്പര്യത്തെ സാമ്പത്തികരംഗവുമായും സമൂഹവുമായും ബന്ധിപ്പിക്കാനും ഈ സഹായങ്ങൾ വഴിതെളിച്ചിട്ടുണ്ട്.
For more details: The Indian Messenger
