ഇന്ത്യ-കുവൈത്ത് സഹകരണം ശക്തമാക്കാൻ ‘മീഡിയ കണക്ട്’; മാധ്യമങ്ങൾക്കായി പ്രതിമാസ സംവാദം പ്രഖ്യാപിച്ച് ഇന്ത്യൻ അംബാസഡർ.
കുവൈത്ത് സിറ്റി: ഇന്ത്യയും കുവൈത്തും തമ്മിലുള്ള സാംസ്കാരിക, മാധ്യമ സഹകരണം കൂടുതൽ ഊട്ടിയുറപ്പിക്കുന്നതിനായി ‘ഇന്ത്യ-കുവൈത്ത് മീഡിയ കണക്ട് – പാർട്ണർഷിപ്പ്, പെർസ്പെക്റ്റീവ്സ്, പോസിബിലിറ്റീസ്’ എന്ന പുതിയ സംരംഭത്തിന് തുടക്കമായി. ഇരുരാജ്യങ്ങളും തമ്മിലുള്ള ആശയവിനിമയത്തിനും വിചാരവിനിമയത്തിനും പരസ്പര ധാരണ വർദ്ധിപ്പിക്കുന്നതിനുമായി ഒരു സ്ഥിരം വേദി സൃഷ്ടിക്കുകയാണ് ഇതിലൂടെ ലക്ഷ്യമിടുന്നത്. ഉദ്ഘാടന ചടങ്ങിൽ സംസാരിച്ച കുവൈത്തിലെ ഇന്ത്യൻ അംബാസഡർ പരമിത ത്രിപാഠി, ഇന്ത്യയും കുവൈത്തും തമ്മിലുള്ള ബന്ധം ചരിത്രത്തിൽ ആഴത്തിൽ വേരൂന്നിയതാണെന്നും ശക്തമായ ജനകീയ ബന്ധങ്ങളാൽ സമ്പന്നമാണെന്നും, ഇരു സമൂഹങ്ങളെയും കൂടുതൽ അടുപ്പിക്കുന്നതിൽ മാധ്യമങ്ങൾ പ്രധാന പങ്ക് വഹിക്കുന്നുണ്ടെന്നും വ്യക്തമാക്കി.
“കഴിഞ്ഞ പതിറ്റാണ്ടുകളായി ഇരുരാജ്യങ്ങളിലെയും മാധ്യമങ്ങൾ നമ്മുടെ സമൂഹങ്ങളെ പരസ്പരം അടുപ്പിക്കുന്നതിലും നമ്മെ ബന്ധിപ്പിക്കുന്ന കഥകൾ പ്രചരിപ്പിക്കുന്നതിലും വലിയ പങ്കാണ് വഹിച്ചിട്ടുള്ളത്,” അവർ പറഞ്ഞു. വാണിജ്യം, നൂതന സാങ്കേതികവിദ്യ, സംസ്‌കാരം, വിദ്യാഭ്യാസം, ടൂറിസം, ജനങ്ങൾ തമ്മിലുള്ള ഉഭയകക്ഷി ബന്ധം തുടങ്ങിയ മേഖലകളിൽ കൂടുതൽ ശ്രദ്ധ അർഹിക്കുന്ന നിരവധി കഥകൾ ഇരുരാജ്യങ്ങൾക്കുമിടയിലുണ്ടെന്ന് അവർ ചൂണ്ടിക്കാട്ടി.
പ്രതിമാസ മാധ്യമ സമ്പർക്ക പരിപാടി
ഈ സംരംഭത്തിന്റെ ഭാഗമായി എല്ലാ മാസത്തെയും അവസാന പ്രവൃത്തിദിനത്തോടനുബന്ധിച്ച് മാധ്യമപ്രവർത്തകരുമായി ആശയവിനിമയം നടത്തുന്ന ഒരു പ്രതിമാസ അൗദ്യോഗിക സംവാദം സംഘടിപ്പിക്കാൻ ഇന്ത്യൻ എംബസി തീരുമാനിച്ചിട്ടുണ്ട്. “എംബസിയുടെ പ്രവർത്തനങ്ങളെക്കുറിച്ചും പദ്ധതികളെക്കുറിച്ചുമുള്ള വിവരങ്ങൾ പങ്കുവെക്കുന്നതിനും ഇന്ത്യയിലെയും ഇന്ത്യ-കുവൈത്ത് ബന്ധങ്ങളിലെയും പുതിയ സംഭവവികാസങ്ങളെക്കുറിച്ച് ചർച്ച ചെയ്യുന്നതിനും ഈ കൂട്ടായ്മ ഒരു അവസരമൊരുക്കും,” പരമിത ത്രിപാഠി പറഞ്ഞു. മാധ്യമപ്രവർത്തകരുടെ നിർദ്ദേശങ്ങൾ സ്വീകരിച്ചുകൊണ്ട്, അവരുടെ ആവശ്യങ്ങൾക്കും താൽപ്പര്യങ്ങൾക്കും അനുസൃതമായി ഈ വേദിയെ വികസിപ്പിക്കാനാണ് എംബസി ആഗ്രഹിക്കുന്നതെന്നും അവർ കൂട്ടിച്ചേർത്തു.
For more details: The Indian Messenger
