ചിത്രാഞ്ജലി: സമഗ്ര നവീകരണത്തിന് സർക്കാരിന്റെ പൂർണ്ണ ശ്രദ്ധയും പിന്തുണയും ഉറപ്പുനൽകി മന്ത്രി പി. സി. വിഷ്ണുനാഥ്.
തിരുവനന്തപുരം: മലയാള സിനിമയുടെ അഭിമാന സ്തംഭമായ ചിത്രാഞ്ജലി ഫിലിം സ്റ്റുഡിയോയെ പുതിയ കാലഘട്ടത്തിന്റെ സാങ്കേതിക തികവോടെ സമഗ്രമായി നവീകരിക്കുമെന്നും സ്ഥാപനത്തെ സ്വയംപര്യാപ്തതയിലേക്ക് നയിക്കുമെന്നും ടൂറിസം, സാംസ്‌കാരികം, സിനിമാ വകുപ്പ് മന്ത്രി പി. സി. വിഷ്ണുനാഥ് വ്യക്തമായി പ്രഖ്യാപിച്ചു. ചിത്രാഞ്ജലി സ്റ്റുഡിയോ നേരിട്ട് സന്ദർശിച്ച ശേഷം ഉദ്യോഗസ്ഥരുമായും ജീവനക്കാരുമായും നടത്തിയ ഉന്നതതല അവലോകന യോഗത്തിലാണ് മന്ത്രി ഈ പ്രഖ്യാപനം നടത്തിയത്.
അത്യാധുനിക ഡിജിറ്റൽ പരിഷ്‌കാരങ്ങൾക്കും നവീന സാങ്കേതികവിദ്യകൾക്കും അനുസൃതമായി സ്റ്റുഡിയോയെ പൂർണ്ണമായും സജ്ജമാക്കാനാണ് ലക്ഷ്യമിടുന്നത്. ചിത്രാഞ്ജലിയിലുള്ള വിശാലമായ ഭൂമിയും ഭൗതിക സാഹചര്യങ്ങളും പരമാവധി പ്രയോജനപ്പെടുത്തി നിർമ്മാണ പ്രവർത്തനങ്ങൾ വേഗത്തിൽ പൂർത്തിയാക്കി സ്ഥാപനത്തെ പൂർണ്ണതോതിൽ പ്രവർത്തനസജ്ജമാക്കും. കൂടാതെ, സംസ്ഥാനത്തിന്റെ വിവിധ ഭാഗങ്ങളിൽ നിർമ്മാണത്തിലുള്ള തിയേറ്ററുകളുമായി ബന്ധപ്പെട്ട പ്രതിസന്ധികൾ സൂക്ഷ്മമായി പരിശോധിച്ച് വേഗത്തിൽ പരിഹരിക്കുമെന്നും അദ്ദേഹം പറഞ്ഞു.
നിലവിലുള്ള തിയേറ്റർ വരുമാനത്തിന് പുറമെ, സ്ഥാപനത്തെ സാമ്പത്തികമായി സ്വയംപര്യാപ്തമാക്കുന്ന പുതിയ വരുമാന മാർഗ്ഗങ്ങൾ കണ്ടെത്തും. മലയാള സിനിമയിലെ മുൻനിര ചലച്ചിത്ര പ്രവർത്തകർക്കെല്ലാം ചിത്രാഞ്ജലിയുമായി ആഴത്തിലുള്ള വൈകാരിക ബന്ധമാണുള്ളത്. ഈ ബന്ധവും പൊതുജനങ്ങളുടെ പിന്തുണയും സമന്വയിപ്പിച്ച്, ചലച്ചിത്ര പ്രവർത്തകരെയും സാധാരണക്കാരെയും ഒരുപോലെ ആകർഷിക്കുന്ന പ്രമുഖ സാംസ്കാരിക കേന്ദ്രമാക്കി ചിത്രാഞ്ജലിയെ മാറ്റിയെടുക്കും. ചിത്രാഞ്ജലിയുടെ സമഗ്ര പുരോഗതിക്കായി സർക്കാരിന്റെയും വകുപ്പിന്റെയും പൂർണ്ണ പിന്തുണയുണ്ടാകുമെന്നും മന്ത്രി ഉറപ്പുനൽകി. സംസ്ഥാന ചലച്ചിത്ര വികസന കോർപ്പറേഷൻ ചെയർമാൻ പ്രേം കുമാർ, വൈസ് ചെയർമാൻ ആലപ്പി അഷ്‌റഫ്, മാനേജിംഗ് ഡയറക്ടർ സബിത ബായ് എ. എസ്. എന്നിവരും യോഗത്തിൽ പങ്കെടുത്തു.
For more details: The Indian Messenger
