യു.എ.ഇയിലെ 4 കോൺസുലാർ സേവന കേന്ദ്രങ്ങൾ ഒക്ടോബർ 22 മുതൽ പൂട്ടി; ഇന്ത്യൻ എംബസി പുതിയ വിവരങ്ങൾ പുറത്തുവിട്ടു.
യു.എ.ഇയിലെ നാല് കോൺസുലാർ അപ്ലിക്കേഷൻ സെന്ററുകൾ അടച്ചുപൂട്ടിയതായി ഇന്ത്യൻ എംബസി അറിയിച്ചു. ഇതോടെ രാജ്യത്തെ ആകെ ഐ.സി.എ.സി (ICAC) കേന്ദ്രങ്ങളുടെ എണ്ണം 12 ആയി കുറഞ്ഞു.
പാസ്‌പോർട്ട്, വിസ, അറ്റസ്റ്റേഷൻ സേവനങ്ങൾ അൽ ഹിന്ദ് ടൂർസ് ആൻഡ് ട്രാവൽസിന് ഔട്ട്‌സോഴ്സ് ചെയ്തതുമുതൽ എമിറേറ്റുകളിലുടനീളം 16 കേന്ദ്രങ്ങളാണ് പ്രവർത്തിച്ചിരുന്നത്. അതേസമയം, അൽ ദാന, അൽ ഐൻ, മദീനത് സായിദ്, അൽ ദഫ്ര, ഘയാതി, ബുർ ദുബായ്, ഇന്ത്യൻ അസോസിയേഷൻ ഷാർജ, അജ്മാൻ, ഉം അൽ ഖുവൈൻ, റാസൽഖൈമ, ഫുജൈറ, കൽബ, ഖോർ ഫുക്കാൻ എന്നീ കേന്ദ്രങ്ങൾ പതിവുപോലെ സേവനങ്ങൾ തുടർന്നുനൽകും. എല്ലാ ഐ.സി.എ.സി കേന്ദ്രങ്ങളും രാവിലെ 8 മുതൽ വൈകുന്നേരം 6 വരെയാണ് പ്രവർത്തിക്കുന്നത്. മുൻകൂട്ടി നിശ്ചയിച്ച അപ്പോയിന്റ്മെന്റിന് 15 മിനിറ്റ് മുമ്പ് മാത്രമേ അപേക്ഷകരെ കേന്ദ്രങ്ങളിലേക്ക് പ്രവേശിപ്പിക്കുകയുള്ളൂ. ബുർ ദുബായ് കേന്ദ്രത്തിൽ കാത്തിരിപ്പ് സമയം കുറയ്ക്കുന്നതിനായി 45 കൗണ്ടറുകൾ സജ്ജീകരിച്ചിട്ടുണ്ട്.
അടിയന്തര ആവശ്യങ്ങൾക്ക് വലിയ ആശ്വാസമായി, തത്കാൽ പാസ്‌പോർട്ട് സേവനങ്ങൾ, നവജാത ശിശുക്കളുടെ അപേക്ഷകൾ, എമർജൻസി സർട്ടിഫിക്കറ്റ് (EC) അപേക്ഷകൾ, 60 വയസും അതിൽ കൂടുതലുമുള്ള മുതിർന്ന പൗരന്മാർ എന്നിവരുടെ അപേക്ഷകൾ എല്ലാ ഐ.സി.എ.സി കേന്ദ്രങ്ങളിലും ക്യൂവിന്റെ അടിസ്ഥാനത്തിൽ (walk-in, first-come, first-served) നേരിട്ട് സ്വീകരിക്കുന്നതാണെന്ന് എംബസി അറിയിച്ചു.
2012 ലെ നിരക്കുകൾക്ക് ശേഷം ആദ്യമായി, ജൂലൈ 1 മുതൽ പ്രാബല്യത്തിൽ വരുന്ന രീതിയിൽ ഇന്ത്യാ സർക്കാർ യു.എ.ഇയിലെ പാസ്‌പോർട്ട് സേവന നിരക്കുകൾ പരിഷ്കരിച്ചിരുന്നു. പുതിയ ഘടന പ്രകാരം, സാധാരണ 36 പേജുള്ള പാസ്‌പോർട്ട് പുതുക്കുന്നതിന് 450 ദിർഹമാണ് (മുൻപ് 285 ദിർഹമായിരുന്നു) നിരക്ക്. തത്കാൽ (അടിയന്തര) പുതുക്കലിന് 900 ദിർഹം നൽകണം. 60 പേജുള്ള പാസ്‌പോർട്ടിന് സാധാരണ പുതുക്കലിന് 630 ദിർഹവും തത്കാൽ സേവനത്തിന് 1,080 ദിർഹവുമാണ് നിരക്ക്.
സർക്കാർ നിശ്ചയിച്ച ഫീസിന് പുറമെ 19 ദിർഹം സർവീസ് ഫീസായി ഈടാക്കുമെന്ന് അൽ ഹിന്ദ് നേരത്തെ വ്യക്തമാക്കിയിരുന്നു. ഫോട്ടോകോപ്പി, ഫോട്ടോഗ്രാഫി തുടങ്ങിയ എല്ലാ സേവനങ്ങളും ഇതിൽ ഉൾപ്പെടും.
ഭരണപരമായ കാരണങ്ങളാൽ ഒക്ടോബർ 22 വ്യാഴാഴ്ച മുതൽ താഴെ പറയുന്ന നാല് കേന്ദ്രങ്ങളിലെ സേവനങ്ങൾ നിർത്തലാക്കുന്നതാണ്. മുസഫ, അൽ റീം, ദുബായ് ഇൻവെസ്റ്റ്‌മെന്റ് പാർക്ക്-I, ഷാർജ അൽ മജാസ് എന്നിവിടങ്ങളിലെ കേന്ദ്രങ്ങളാണ് ഇവ.
For more details: The Indian Messenger
