2026 ദേശീയ രക്തദാന ക്യാമ്പയിന് തുടക്കമിട്ട് സൗദി കിരീടാവകാശി രക്തം നൽകി.
സൗദി അറേബ്യയുടെ വാർഷിക ദേശീയ രക്തദാന ക്യാമ്പയിൻ ഉദ്ഘാടനം ചെയ്തുകൊണ്ട് കിരീടാവകാശി മുഹമ്മദ് ബിൻ സൽമാൻ ചൊവ്വാഴ്ച രക്തം നൽകി.
മാനുവഷിക പ്രവർത്തനങ്ങളോടും സമൂഹത്തിന്റെ ആരോഗ്യം മെച്ചപ്പെടുത്തുന്നതിനോടുമുള്ള കിരീടാവകാശിയുടെ നിരന്തരമായ പ്രതിബദ്ധതയും, സന്നദ്ധസേവന സംസ്കാരവും പരസ്പര സഹായവും വളർത്താൻ ലക്ഷ്യമിട്ടുള്ള ദേശീയ ഉദ്യമങ്ങൾക്കുള്ള അദ്ദേഹത്തിന്റെ തുടർച്ചയായ പിന്തുണയുമാണ് ഈ പ്രവൃത്തിയിലൂടെ വെളിപ്പെടുന്നതെന്ന് സൗദി പ്രസ് ഏജൻസി റിപ്പോർട്ട് ചെയ്തു.
അടിയന്തര വൈദ്യസഹായം ആവശ്യമുള്ളവർക്കും, കാൻസർ, രക്തസംബന്ധമായ അസുഖങ്ങൾ അല്ലെങ്കിൽ മറ്റ് ഗുരുതരമായ അവസ്ഥകൾ എന്നിവയാൽ കഷ്ടപ്പെടുന്ന രോഗികൾക്കും ജീവൻ രക്ഷിക്കാൻ രക്തദാനം എത്രത്തോളം പ്രധാനമാണെന്ന് ഇത് അടിവരയിടുന്നുവെന്ന് ഉദ്യോഗസ്ഥർ വ്യക്തമാക്കി.
പതിവായി സന്നദ്ധ രക്തദാനം നടത്തേണ്ടതിന്റെ പ്രാധാന്യത്തെക്കുറിച്ച് അവബോധം വളർത്തുക, സാമൂഹിക ഉത്തരവാദിത്തബോധം ഉണ്ടാക്കുക, രക്തത്തിന്റെയും അതിന്റെ ഘടകങ്ങളുടെയും കാര്യത്തിൽ രാജ്യം സ്വയംപര്യാപ്തത കൈവരിക്കുക എന്നിവയാണ് ഈ വാർഷിക ക്യാമ്പയിൻ ലക്ഷ്യമിടുന്നതെന്ന് സംഘാടകർ പറയുന്നു. രാജ്യത്തുടനീളമുള്ള രോഗികളുടെ ആവശ്യങ്ങൾ നിറവേറ്റുന്നതിനായി സുരക്ഷിതവും സുസ്ഥിരവുമായ ശേഖരം നിലനിർത്താൻ ആരോഗ്യമേഖല നടത്തുന്ന ശ്രമങ്ങൾക്ക് പിന്തുണയേകാൻ ഇത് സഹായിക്കുമെന്നും അവർ കൂട്ടിച്ചേർത്തു.
ഔദ്യോഗിക കണക്കുകൾ പ്രകാരം, സന്നദ്ധ രക്തദാന സംസ്കാരം വളർത്തുന്നതിൽ രാജ്യം വലിയ പുരോഗതിയാണ് കൈവരിക്കുന്നത്. 2025-ൽ മാത്രം രക്തദാതാക്കളുടെ ആകെ എണ്ണം 900,000 കവിഞ്ഞിട്ടുണ്ട്.
For more details: The Indian Messenger
