ഭൂട്ടാനിൽ ഹിമതടാകം പൊട്ടിത്തെറിച്ചു: ബംഗാളിലും അസമിലും മിന്നൽ പ്രളയ മുന്നറിയിപ്പ്.
തിംഫു: വടക്കുപടിഞ്ഞാറൻ ഭൂട്ടാനിലെ ഗാസ ജില്ലയിലുള്ള ഷിന്റാഫു തടാകത്തിൽ ഹിമതടാക സ്ഫോടനം (Glacial Lake Outburst Flood – GLOF) ഉണ്ടായതിനെ തുടർന്ന് അസമിന്റെയും പശ്ചിമ ബംഗാളിന്റെയും വിവിധ ഭാഗങ്ങളിൽ മിന്നൽ പ്രളയ മുന്നറിയിപ്പ് പ്രഖ്യാപിച്ചു. വ്യാഴാഴ്ച വൈകുന്നേരമാണ് സംഭവം. ഗാസ ജില്ലയിൽ മോ ചു നദിയുടെ തീരത്ത് സ്ഥിതി ചെയ്യുന്ന പ്രശസ്തമായ ഗാസ ത്സാച്ചു സ്വാഭാവിക ഉഷ്ണനീരുറവ കേന്ദ്രം പ്രളയജലത്തിൽ പൂർണ്ണമായി ഒലിച്ചുപോയി. മുൻകൂട്ടി ആളുകളെ ഒഴിപ്പിച്ചതിനാൽ ജീവഹാനി റിപ്പോർട്ട് ചെയ്തിട്ടില്ല.
മോ ചു നദിയുടെ ഉറവിടത്തിൽ സ്ഥിതി ചെയ്യുന്ന ഷിന്റാഫു തടാകം, ഭൂട്ടാനിലെ അപകടസാധ്യതയുള്ള 17 പ്രധാന ഹിമതടാകങ്ങളിൽ ഒന്നായാണ് കണക്കാക്കപ്പെടുന്നത്. 2021 ഓഗസ്റ്റ് 26-നുണ്ടായ ശക്തമായ മിന്നൽ പ്രളയത്തിൽ കരകവിഞ്ഞൊഴുകിയ മോ ചു നദി ഗതിമാറി ഒഴുകിയതിനെ തുടർന്ന് മുൻപും ഗാസ ത്സാച്ചു പൂർണ്ണമായി തകർന്നിരുന്നു.
വെള്ളപ്പൊക്ക ജലം ഇപ്പോൾ പുനാഖ സോങ്ങിൽ നിന്ന് എട്ട് കിലോമീറ്റർ അകലെയുള്ള കബേസ ഗെവോഗിലെ ശ്രീഗാംഗ് കടന്നുപോയിട്ടുണ്ട്.
ഭൂട്ടാനുമായി അതിർത്തി പങ്കിടുന്ന ജില്ലകളിൽ മിന്നൽ പ്രളയ സാധ്യതയുള്ളതിനാൽ ബംഗാൾ, അസം സർക്കാരുകൾക്ക് ഭൂട്ടാൻ ഭരണകൂടം ജാഗ്രതാ നിർദ്ദേശം നൽകിയിട്ടുണ്ട്. അസമിലെ ധുബ്രി, പശ്ചിമ ബംഗാളിലെ ഡാർജിലിംഗ് മലനിരകൾ, അലിപൂർദുവർ, ജൽപായ്ഗുരി ജില്ലകൾ എന്നിവ പ്രളയഭീഷണിയിലാണ്.
പശ്ചിമ ബംഗാളിലെ കൂച്ച് ബിഹാറിൽ, സംകോഷ് നദിയുടെ തീരത്ത് താമസിക്കുന്നവർക്ക് ജില്ലാ ഭരണകൂടം ജാഗ്രതാ നിർദ്ദേശം നൽകിയിട്ടുണ്ട്. വടക്കൻ ഭൂട്ടാനിൽ നിന്ന് ഉത്ഭവിച്ച് മോ ചു, ഫോ ചു ഉൾപ്പെടെയുള്ള പ്രധാന ഉപനദികൾ ചേർന്ന് രൂപപ്പെടുന്ന സംകോഷ് നദി പിന്നീട് അസമിലൂടെ ഒഴുകി ബ്രഹ്മപുത്രയിലാണ് പതിക്കുന്നത്.
For more details: The Indian Messenger
