അത്തച്ചമയം
അത്തച്ചമയം എന്നത് കേരളത്തിലെ പത്ത് ദിവസം നീണ്ടുനിൽക്കുന്ന ഓണാഘോഷങ്ങൾക്ക് തുടക്കം കുറിക്കുന്ന ഒരു വർണാഭമായ സാംസ്കാരിക ഘോഷയാത്രയാണ്. കൊച്ചിക്ക് സമീപമുള്ള തൃപ്പൂണിത്തുറയിലാണ് ഈ ആഘോഷം നടക്കുന്നത്. പണ്ട് കൊച്ചി രാജാവിൻ്റെ വിജയത്തെ അനുസ്മരിക്കുന്ന ഒരു ചടങ്ങായിരുന്നു ഇത്. രാജാവ് തൻ്റെ പ്രജകളെ കാണാനും അവരുമായി സംവദിക്കാനും വേണ്ടി നടത്തിയ രാജകീയ ഘോഷയാത്രയുടെ ഓർമ്മകളാണ് അത്തച്ചമയം.
ഇന്ന്, കൊച്ചി രാജാവ് ഇല്ലെങ്കിലും ഈ രാജകീയ പാരമ്പര്യം അതേ പ്രൗഢിയോടെ ആഘോഷിക്കുന്നു. ഇപ്പോൾ ഇതൊരു സർക്കാർ പരിപാടിയാണ്, കേരളത്തിന്റെ സാംസ്കാരിക വൈവിധ്യം മുഴുവൻ ഈ ഘോഷയാത്രയിൽ ദൃശ്യമാകും.
വിവിധ കലാരൂപങ്ങൾ, വാദ്യമേളങ്ങൾ, നിശ്ചലദൃശ്യങ്ങൾ, അലങ്കരിച്ച ആനകൾ എന്നിവയടങ്ങുന്ന വർണ്ണാഭമായ ഘോഷയാത്രയാണ് ഇതിന്റെ പ്രധാന ആകർഷണം.
കഥകളി, പുലികളി, തിറ, കുംമാട്ടി, ഓണത്തല്ല്, ചെണ്ടമേളം, പഞ്ചവാദ്യം തുടങ്ങിയ കേരളത്തിന്റെ തനത് കലാരൂപങ്ങൾ ഈ ഘോഷയാത്രയിൽ അണിനിരക്കുന്നു.
ചരിത്രപരവും പുരാണപരവുമായ സംഭവങ്ങളെയും ആധുനിക സാമൂഹിക വിഷയങ്ങളെയും ആസ്പദമാക്കിയുള്ള നിശ്ചലദൃശ്യങ്ങളും ഘോഷയാത്രക്ക് മാറ്റുകൂട്ടുന്നു.
വിവിധ മതങ്ങളിൽപ്പെട്ട ആളുകൾ ഒരുമിച്ചാണ് ഈ ഘോഷയാത്രയിൽ പങ്കെടുക്കുന്നത്. ഇത് കേരളത്തിന്റെ മതസൗഹാർദ്ദത്തിന്റെ ഉത്തമ ഉദാഹരണമാണ്.
അത്തച്ചമയം ഓണാഘോഷങ്ങളുടെ ഔദ്യോഗികമായ തുടക്കമാണ്. അത്തം നാളിൽ ഈ ഘോഷയാത്ര നടക്കുന്നതോടെ കേരളം മുഴുവൻ ഓണത്തിന്റെ ആവേശത്തിലേക്ക് കടക്കുന്നു. അതുകൊണ്ടാണ് “അത്തം പത്ത്” എന്ന് ഓണത്തെ പറ്റി പറയുന്നത്. ഈ ഘോഷയാത്ര, മഹാബലി ചക്രവർത്തിയെ വരവേൽക്കാൻ ഒരുങ്ങുന്ന മലയാളികളുടെ ഉത്സാഹവും സന്തോഷവും വിളിച്ചോതുന്നു. ഈ ആഘോഷത്തോടെയാണ് വീടുകളിൽ പൂക്കളമിടാനും മറ്റ് ഓണത്തിനായുള്ള ഒരുക്കങ്ങൾക്കും തുടക്കമാകുന്നത്.
2025-ൽ ഓണാഘോഷങ്ങൾക്ക് തുടക്കം കുറിച്ചുകൊണ്ടുള്ള അത്തം നക്ഷത്രം 2025 ഓഗസ്റ്റ് 26-നാണ് വരുന്നത്.
With input from KT
