ലെമൺ മർഡർ കേസ് (L.M. കേസ്): ആകാംഷയുടെ മുൾമുനയിൽ നിർത്തി ഒരു ഇൻവസ്റ്റിഗേറ്റീവ് ക്രൈം ത്രില്ലർ!
കൊല്ലങ്കോട്: പൂർണ്ണമായും ഒരു ഇൻവസ്റ്റിഗേറ്റീവ് മർഡർ കേസിന്റെ ചലച്ചിത്രാവിഷ്കാരമായ ‘ലെമൺ മർഡർ കേസ്’ (L.M. കേസ്) പൂർത്തിയായി പ്രദർശനത്തിന് ഒരുങ്ങുന്നു. ഏറെ ശ്രദ്ധേയമായ ‘ഗുമസ്തൻ’ എന്ന ചിത്രത്തിനു തിരക്കഥയൊരുക്കിയ റിയാസ് ഇസ്മത്ത് ആണ് ഈ ചിത്രം തിരക്കഥ രചിച്ച് സംവിധാനം ചെയ്യുന്നത്.
ജെ.പി. പ്രൊഡക്ഷൻസിന്റെ ബാനറിൽ ജോബി. ജെ. പാലയൂരും, അനിൽ പല്ലശ്ശനയും ചേർന്നാണ് ചിത്രം നിർമ്മിക്കുന്നത്. താരതമ്യേന പുതുമുഖങ്ങൾക്ക് പ്രാധാന്യം നൽകി, വിവിധ കലാരംഗങ്ങളിൽ ശ്രദ്ധേയരായ പ്രതിഭകളെ ഉൾക്കൊള്ളിച്ചാണ് ചിത്രീകരണം പൂർത്തിയാക്കിയത്.
കേസിന്റെ ചുരുളഴിയുമ്പോൾ: കഥാസാരം
പൊലീസ് ഡിപ്പാർട്ട്മെന്റിലെ സമർത്ഥനായ സി.ഐ. ലിയോൺ ഏറ്റെടുത്ത ഒരു കേസിൽ ഫോറൻസിക് വിഭാഗത്തിൽ ചില കൃത്രിമങ്ങൾ നടന്നുവെന്ന് വ്യക്തമായതോടെ, തന്റെ ജൂനിയർ ഉദ്യോഗസ്ഥനോട് ഒരു ഫയൽ കടത്തിത്തരണമെന്ന് ആവശ്യപ്പെടുന്നു. ലിയോണിന്റെ യാത്രക്കിടയിൽ അദ്ദേഹം അവിചാരിതമായി ഒരു ഫോറസ്റ്റിൽ അകപ്പെടുകയും, അവിടെ ചില ദുരൂഹതകൾ കാണാനിടവരികയും ചെയ്യുന്നു. ഈ സാഹചര്യത്തിൽ ലഭിക്കുന്ന ഒരു നാരങ്ങ മറ്റൊരു വലിയ കേസിന്റെ നിർണ്ണായകമായ തുമ്പായി മാറുകയാണ്. ലോകത്ത് ആരും അറിയാതെ പോകുമായിരുന്ന ഒരു അവിശ്വസനീയമായ, വേദനിപ്പിക്കുന്ന കഥയിലേക്കാണ് ഈ നാരങ്ങ സി.ഐ. ലിയോണിനെ നയിക്കുന്നത്. നാരങ്ങയുടെ സാന്നിദ്ധ്യം ഈ ചിത്രത്തെ ‘ലെമൺ മർഡർ കേസ്’ എന്ന ടൈറ്റിലിനെ അന്വർത്ഥമാക്കുന്നു. പ്രേക്ഷകനെ ഉദ്യേഗത്തിന്റെ മുൾമുനയിൽ നിർത്തിക്കൊണ്ടുള്ള അവതരണമാണ് സംവിധായകൻ റിയാസ് ഇസ്മത്ത് ഈ ചിത്രത്തിനു വേണ്ടി സ്വീകരിച്ചിരിക്കുന്നത്.
അഭിനേതാക്കളും അണിയറപ്രവർത്തകരും
ലിയോൺ: പുതുമുഖം ആദി.
നായിക: ജിഷ രജിത്ത്.
മറ്റ് പ്രധാന കഥാപാത്രങ്ങൾ: അപർണ്ണ, കെ. ബാബു എം.എൽ.എ. എന്നിവരും ഏതാനും പുതുമുഖങ്ങളും.
ഛായാഗ്രഹണം: മനോജ്. എം.ജെ.
എഡിറ്റിംഗ്: ജിസൺ ഏ.സി.എ.
സംഗീതം: സജിത് ശങ്കർ.
പശ്ചാത്തല സംഗീതം: രഞ്ജിത്ത് ഉണ്ണി.
കൊല്ലങ്കോട്, ചിറ്റൂർ, നെല്ലിയാമ്പതി എന്നിവിടങ്ങളിലായി ചിത്രീകരണം പൂർത്തിയായ ഈ ചിത്രത്തിന്റെ നിർമ്മാണ പ്രവർത്തനങ്ങൾ ഇപ്പോൾ അന്തിമ ഘട്ടത്തിലാണ്. ചിത്രം ജനുവരി മാസത്തിൽ പ്രദർശനത്തിനെത്തും.
News : Vazhoor jose
For more details: The Indian Messenger
