'ഗ്രീൻലാൻഡ് വിഷയം തങ്ങളുടെ പണിയല്ല'; റഷ്യയ്ക്ക് ആശങ്കയില്ലെന്ന് വ്ലാഡിമിർ പുടിൻ.

മോസ്കോ: ഗ്രീൻലാൻഡ് സ്വന്തമാക്കാനുള്ള യുഎസ് പ്രസിഡന്റ് ഡൊണാൾഡ് ട്രംപിന്റെ താൽപ്പര്യം ഡെന്മാർക്കിനെ പ്രതിസന്ധിയിലാക്കുകയും നാറ്റോ സഖ്യത്തിലെ ഐക്യത്തെ ബാധിക്കുകയും ചെയ്യുന്ന സാഹചര്യത്തിൽ, ഈ വിഷയത്തിൽ തനിക്ക് ആശങ്കയില്ലെന്ന് റഷ്യൻ പ്രസിഡന്റ് വ്ലാഡിമിർ പുടിൻ വ്യക്തമാക്കി.

ബുധനാഴ്ച രാത്രി നടന്ന ദേശീയ സുരക്ഷാ കൗൺസിൽ യോഗത്തിൽ സംസാരിക്കവെയാണ് അദ്ദേഹം ഇക്കാര്യം പറഞ്ഞത്. “ഗ്രീൻലാൻഡിന് എന്ത് സംഭവിക്കുന്നു എന്നത് ഞങ്ങളുടെ പണിയല്ല. ചരിത്രപരമായി ഡെന്മാർക്ക് ഗ്രീൻലാൻഡിനെ ഒരു കോളനിയായിട്ടാണ് കണ്ടിട്ടുള്ളത്. അവരോട് വളരെ ക്രൂരമായ സമീപനമാണ് ഡെന്മാർക്ക് സ്വീകരിച്ചിട്ടുള്ളത്. എന്നാൽ അതൊരു വ്യത്യസ്തമായ കാര്യമാണ്, നിലവിൽ ആർക്കും അതിൽ താൽപ്പര്യമുണ്ടാകുമെന്ന് ഞാൻ കരുതുന്നില്ല,” പുടിൻ പറഞ്ഞു.

ഇതൊരു ആഭ്യന്തര വിഷയമാണെന്നും അവർ തന്നെ അത് പരിഹരിക്കുമെന്നും അദ്ദേഹം കൂട്ടിച്ചേർത്തു. 1917-ൽ വിർജിൻ ഐലൻഡ്‌സ് ഡെന്മാർക്ക് അമേരിക്കയ്ക്ക് വിറ്റ കാര്യവും, 1867-ൽ റഷ്യ അലാസ്ക 7.2 ദശലക്ഷം ഡോളറിന് അമേരിക്കയ്ക്ക് കൈമാറിയ ചരിത്രവും പുടിൻ ഈ അവസരത്തിൽ ഓർമ്മിപ്പിച്ചു. (PTI)

For more details: The Indian Messenger