‘വിദ്യാർത്ഥികൾ രാഷ്ട്രീയ ഉപകരണങ്ങളല്ല’; നീറ്റ് പ്രതിഷേധത്തിൽ കേന്ദ്രമന്ത്രി ധർമേന്ദ്ര പ്രധാന്റെ ആദ്യ പ്രതികരണം.
ന്യൂഡൽഹി: നീറ്റ് (NEET) പരീക്ഷാ വിഷയത്തിൽ രാഹുൽ ഗാന്ധി നടത്തുന്ന പ്രതിഷേധങ്ങൾക്കെതിരെ രൂക്ഷവിമർശനവുമായി കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ രംഗത്തെത്തി. പാർലമെന്റിന്റെ വർഷകാല സമ്മേളനം തടസ്സപ്പെടുത്താൻ രാഹുൽ ഗാന്ധിയും കോൺഗ്രസും വിദ്യാർത്ഥികളെ കേവലം രാഷ്ട്രീയ ഉപകരണങ്ങളായി ഉപയോഗിക്കുകയാണെന്ന് മന്ത്രി ആരോപിച്ചു.
വിഷയത്തിൽ സമഗ്രമായ ചർച്ചയ്ക്ക് സർക്കാർ നൂറ് ശതമാനം തയ്യാറാണെന്ന് വ്യക്തമാക്കിയിട്ടും, ജനാധിപത്യപരമായ ചർച്ചകൾക്ക് പകരം രാഷ്ട്രീയ നാടകങ്ങളാണ് കോൺഗ്രസ് തിരഞ്ഞെടുക്കുന്നതെന്ന് സോഷ്യൽ മീഡിയ പ്ലാറ്റ്ഫോമായ ‘എക്സി’ൽ (X) പങ്കുവെച്ച കുറിപ്പിൽ മന്ത്രി പറഞ്ഞു. പ്രധാനമന്ത്രിയുടെ വസതിക്ക് മുന്നിൽ കോൺഗ്രസ് നടത്തിയ ധർണ സുരക്ഷാ മാനദണ്ഡങ്ങൾ ലംഘിക്കുന്നതും പൊതുജനങ്ങൾക്ക് വലിയ അസൗകര്യമുണ്ടാക്കുന്നതുമായിരുന്നുവെന്ന് മന്ത്രി കുറ്റപ്പെടുത്തി.
വിദ്യാർത്ഥികളുടെ പ്രശ്നങ്ങൾക്ക് പരിഹാരം കാണുന്നതിന് പകരമായി വാർത്തകളിൽ ഇടം പിടിക്കാനും പാർലമെന്റ് നടപടികൾ തടസ്സപ്പെടുത്താനുമാണ് പ്രതിപക്ഷം ശ്രമിക്കുന്നത്. വിദ്യാർത്ഥികളെ ഇത്തരം രാഷ്ട്രീയ പ്രചാരണങ്ങൾക്കുള്ള ആയുധങ്ങളാക്കരുത്. വെറും മുദ്രാവാക്യങ്ങൾക്കും ബഹളങ്ങൾക്കും പകരം വ്യക്തമായ പരിഹാരവും ഉറപ്പുമാണ് അവർ അർഹിക്കുന്നതെന്നും അദ്ദേഹം പറഞ്ഞു.
നീറ്റ് പരീക്ഷയുമായി ബന്ധപ്പെട്ട് യുവാക്കൾ ഉന്നയിക്കുന്ന എല്ലാ ന്യായമായ ആശങ്കകളും സഭയിൽ ചർച്ച ചെയ്യാനും പരിഹരിക്കാനും കേന്ദ്ര സർക്കാർ പൂർണ്ണമായും പ്രതിജ്ഞാബദ്ധമാണെന്നും മന്ത്രി കൂട്ടിച്ചേർത്തു.
English Summary
Union Education Minister Dharmendra Pradhan lashed out at Rahul Gandhi and the Congress over their ongoing protests regarding the NEET examination, accusing them of using students as “political tools” to disrupt the Monsoon Session of Parliament. Pradhan emphasized on X that the government remains fully committed to holding a comprehensive debate on the floor of the House to address all genuine student concerns. Criticizing the Congress’s sit-in near the Prime Minister’s residence, he stated that students deserve concrete solutions and accountability rather than political spectacles and outrage.
For more details: The Indian Messenger
