സ്വാതന്ത്ര്യദിനാഘോഷങ്ങൾക്ക് മുന്നോടിയായി നാഷണൽ വാർ മെമ്മോറിയലിൽ ഇന്ത്യൻ വ്യോമസേനാ ബാൻഡിന്റെ സംഗീത വിരുന്ന്.
ന്യൂഡൽഹി: സ്വാതന്ത്ര്യദിനാഘോഷങ്ങളുടെ ഭാഗമായി ഇന്ത്യൻ വ്യോമസേനാ (IAF) ബാൻഡ് ഓഗസ്റ്റ് 9-ന് ന്യൂഡൽഹിയിലെ നാഷണൽ വാർ മെമ്മോറിയലിലെ പരം യോധ സ്ഥൽ പബ്ലിക് പ്ലാസയിൽ പ്രത്യേക സംഗീത വിരുന്ന് ഒരുക്കും.
വൈകുന്നേരം 5 മണി മുതൽ 6 മണി വരെ നടക്കുന്ന ഈ സംഗീതപരിപാടി, ദേശഭക്തിയുടെ വീര്യം ആഘോഷിക്കുന്നതോടൊപ്പം ദേശീയ ഗീതമായ ‘വന്ദേമാതര’ത്തിന്റെ 150-ാം വാർഷികാഘോഷം കൂടിയായിരിക്കും.
32 എയർമാന്മാരും 3 വനിതകൾ ഉൾപ്പെടെ 8 അഗ്നിവീർവായുവും ഉൾപ്പെടുന്ന 40 അംഗ സംഘമാണ് പരിപാടിയിൽ സംഗീതവിരുന്നൊരുക്കുക. പൊതുജനങ്ങളെ ആകർഷിക്കുന്നതിനും ദേശീയ അഭിമാനം വളർത്തുന്നതിനുമായി തിരഞ്ഞെടുത്ത ദേശഭക്തിഗാനങ്ങളും വികാരനിർഭരമായ ഈണങ്ങളും ബാൻഡ് അവതരിപ്പിക്കും.
രാജ്യത്തിന്റെ സ്വാതന്ത്ര്യദിനം ആഘോഷിക്കുന്നതിനോടൊപ്പം ഇന്ത്യൻ വ്യോമസേനയുടെ പാരമ്പര്യ സംഗീത ശൈലികൾ നേരിട്ടനുഭവിക്കാൻ സന്ദർശകർക്ക് ഈ പരിപാടി അവസരമൊരുക്കുമെന്ന് പ്രതീക്ഷിക്കുന്നു.
മാസ്റ്റർ വാറന്റ് ഓഫീസർ എ. ശ്രീഹരിയായിരിക്കും പ്രധാന കണ്ടക്ടർ. ജൂനിയർ വാറന്റ് ഓഫീസർമാരായ മൂൺ ദേക്ക, അഭിഷേക് പോൾ, സർജന്റ് എൻ.ടി. സിംഗ് എന്നിവർ അദ്ദേഹത്തെ സഹായിക്കും.
സ്വാതന്ത്ര്യദിനത്തോടനുബന്ധിച്ച് വ്യോമസേന നടത്തുന്ന പൊതുജന സമ്പർക്ക പരിപാടികളുടെ ഭാഗമായാണ് ഇത് സംഘടിപ്പിക്കുന്നത്. നാഷണൽ വാർ മെമ്മോറിയലിൽ സംഗീതത്തിലൂടെ ദേശഭക്തി അലതല്ലിക്കുകയാണ് പരിപാടിയുടെ ലക്ഷ്യം.
For more details: The Indian Messenger
