സംവിധായകൻ ലോകേഷ് കനകരാജ് പ്രധാന കഥാപാത്രത്തെ അവതരിപ്പിച്ച് തിയേറ്ററുകളിലെത്തിയ ‘ഡിസി’ (DC) സിനിമയെ പ്രശംസിച്ച് തെലുങ്ക് താരം അല്ലു അർജുൻ. ചിത്രം ഒരു “തമിഴ് ക്ലാസിക്” ആണെന്ന് വിശേഷിപ്പിച്ച അദ്ദേഹം, സിനിമ പ്രേമികൾ തീർച്ചയായും കണ്ടിരിക്കേണ്ട ഒന്നാണെന്നും അഭിപ്രായപ്പെട്ടു.
അരുൺ മാതേശ്വരൻ സംവിധാനം ചെയ്ത ചിത്രം ഓഗസ്റ്റ് 7-നാണ് തിയേറ്ററുകളിൽ റിലീസ് ചെയ്തത്. വാമിക ഗബ്ബിയാണ് ചിത്രത്തിൽ നായികയായി എത്തുന്നത്.
തന്റെ എക്സ് പ്ലാറ്റ്ഫോമിലൂടെയാണ് അല്ലു അർജുൻ ചിത്രത്തിലെ അഭിനേതാക്കളെയും അണിയറപ്രവർത്തകരെയും അഭിനന്ദിച്ച് കുറിപ്പ് പങ്കുവെച്ചത്: “ഡിസി കണ്ടു! ഇതൊരു തമിഴ് ക്ലാസിക് ചിത്രമാണ്. ഓരോ സിനിമാ പ്രേമിയും ഇത് തീർച്ചയായും കണ്ടിരിക്കണം. സിനിമയെ ആഴത്തിൽ മനസ്സിലാക്കുന്നവർക്ക് ഇതൊരു കവിത പോലെയാണ്. ഡിസി ടീമിന് മുഴുവൻ എന്റെ ആശംസകൾ. സംവിധായകൻ അരുൺ മാതേശ്വരൻ സാറിനോട് വലിയ ബഹുമാനം തോന്നുന്നു. അനിരുദ്ധ് രവിചന്ദർ മികച്ച സംഗീതം കൊണ്ട് അദ്ഭുതപ്പെടുത്തിയിരിക്കുന്നു. സാങ്കേതികമായി സിനിമ വളരെ മികച്ചുനിൽക്കുന്നു. എല്ലാ അഭിനേതാക്കളും, പ്രത്യേകിച്ച് വാമിക ഗബ്ബിയും, ചിത്രത്തിന്റെ ഏറ്റവും വലിയ തൂണായ നായകൻ ലോകേഷും ഗംഭീര പ്രകടനമാണ് കാഴ്ചവെച്ചത്,” എന്ന് അല്ലു അർജുൻ കുറിച്ചു.
For more details: The Indian Messenger
