ജാഖണ്ഡ് ജെ.പി.എസ്.സി – ജെ.എസ്.എസ്.സി തർക്കം: സർക്കാരുമായി ചർച്ചയ്ക്ക് തയാറായി ഉദ്യോഗാർത്ഥികൾ; പരീക്ഷാ ക്രമക്കേടിൽ 5 പേരെക്കൂടി സി.ഐ.ഡി അറസ്റ്റ് ചെയ്തു.
റാഞ്ചി: ജാഖണ്ഡ് പബ്ലിക് സർവീസ് കമ്മീഷൻ (ജെ.പി.എസ്.സി), ജാഖണ്ഡ് സ്റ്റാഫ് സെലക്ഷൻ കമ്മീഷൻ (ജെ.എസ്.എസ്.സി) എന്നിവ നടത്തിയ പരീക്ഷകളിലെ ക്രമക്കേടുകൾക്കെതിരെ സമരം ചെയ്യുന്ന ഉദ്യോഗാർത്ഥികൾ സർക്കാരുമായി ചർച്ചയ്ക്ക് സന്നദ്ധത അറിയിച്ചു. പ്രധാന ആവശ്യങ്ങൾ അംഗീകരിച്ചാൽ സമരം അവസാനിപ്പിക്കുമെന്നാണ് ‘ജെ.പി.എസ്.സി – ജെ.എസ്.എസ്.സി റിഫോം ഫോറത്തിന്റെ’ നേതൃത്വത്തിൽ പ്രതിഷേധിക്കുന്ന ഉദ്യോഗാർത്ഥികൾ വ്യക്തമാക്കിയത്.
ബുധനാഴ്ച വൈകിട്ട് കോർ കമ്മിറ്റി അംഗങ്ങളായ രവീന്ദ്ര പസ്വാൻ, പിയൂഷ് എന്നിവരുടെ സാന്നിധ്യത്തിൽ ഫോറം വിളിച്ചുചേർത്ത വാർത്താസമ്മേളനത്തിലാണ് ഈ തീരുമാനം പ്രഖ്യാപിച്ചത്. എന്നാൽ സർക്കാരുമായി ചർച്ച ആരംഭിച്ചു എന്നതുകൊണ്ട് മാത്രം സമരം പിൻവലിക്കില്ലെന്നും ഫോറം വ്യക്താമാക്കിയിട്ടുണ്ട്.
പ്രതിഷേധക്കാർക്ക് സന്ദേശമയച്ച് സർക്കാർ പ്രതിഷേധിക്കുന്ന ഉദ്യോഗാർത്ഥികളുടെ പ്രതിനിധികളുമായി ചർച്ച നടത്താൻ താല്പര്യമുണ്ടെന്ന് എസ്.ഡി.എം, എസ്.ഡി.ഓ എന്നിവർ മുഖേന സംസ്ഥാന സർക്കാർ സന്ദേശം അറിയിച്ചതായി വിദ്യാർത്ഥി നേതാക്കൾ പറഞ്ഞു. നിർദ്ദേശം ചർച്ച ചെയ്ത ഫോറത്തിന്റെ കോർ കമ്മിറ്റി സർക്കാരുമായി ചർച്ചയ്ക്ക് തയാറാണെന്ന് ഐക്യകണ്ഠേന തീരുമാനിക്കുകയായിരുന്നു.
“കൂടിക്കാഴ്ചയ്ക്കുള്ള തീയതിയോ സമയമോ സ്ഥലമോ സർക്കാർ ഇതുവരെ ഔദ്യോഗികമായി അറിയിച്ചിട്ടില്ല. ഷെഡ്യൂൾ നിശ്ചയിച്ചയുടൻ ഫോറം പ്രതിനിധി സംഘത്തെ അയക്കും,” രവീന്ദ്ര പസ്വാൻ പറഞ്ഞു. അഞ്ചംഗ പ്രതിനിധി സംഘമായിരിക്കും ചർച്ചയിൽ പങ്കെടുക്കുക. ഇവരുടെ പേരുകൾ ഉടൻ പ്രഖ്യാപിക്കും.
‘ചർച്ചകൾ കൊണ്ടുമാത്രം സമരം അവസാനിപ്പിക്കില്ല’ ചർച്ചകൾക്ക് തയാറാണെങ്കിലും വിദ്യാർത്ഥികളുടെ ആവശ്യങ്ങളിൽ സർക്കാർ അനുകൂലമായ തീരുമാനങ്ങൾ എടുക്കുമെന്നാണ് പ്രതീക്ഷിക്കുന്നതെന്ന് പസ്വാൻ പറഞ്ഞു. പ്രധാന ആവശ്യങ്ങളെല്ലാം അംഗീകരിച്ചാൽ സമരം അവസാനിപ്പിക്കുന്നത് പരിഗണിക്കുമെന്നും എന്നാൽ കൃത്യമായ തീരുമാനങ്ങൾ ഉണ്ടായില്ലെങ്കിൽ സമരം തുടരുമെന്നും അദ്ദേഹം വ്യക്തമാക്കി.
അതേസമയം, ഈ പ്രക്ഷോഭത്തിന് പിന്നിൽ രാഷ്ട്രീയ ലക്ഷ്യങ്ങളില്ലെന്ന് കോർ കമ്മിറ്റി അംഗം പിയൂഷ് പറഞ്ഞു. മത്സരപരീക്ഷകളിൽ സുതാര്യത ഉറപ്പാക്കാനും യുവാക്കളുടെ ഭാവി സംരക്ഷിക്കാനുമാണ് ഉദ്യോഗാർത്ഥികൾ തെരുവിലിറങ്ങിയിരിക്കുന്നത്. സർക്കാരുമായി ചർച്ച നടത്താനുള്ള തീരുമാനത്തെ സ്വാഗതം ചെയ്യുന്നുണ്ടെങ്കിലും ഫലം ഉദ്യോഗാർത്ഥികൾക്ക് അനുകൂലമായിരിക്കണം. വെറുമൊരു ചർച്ചകൊണ്ടുമാത്രം സമരം അവസാനിപ്പിക്കാൻ സാധിക്കില്ലെന്നും അദ്ദേഹം പറഞ്ഞു.
പ്രധാന ആവശ്യങ്ങൾ ആവർത്തിച്ച് ഉദ്യോഗാർത്ഥികൾ റിഫോം ഫോറം തങ്ങളുടെ പ്രധാന ആവശ്യങ്ങൾ വീണ്ടും സർക്കാരിന് മുന്നിൽ വെച്ചിട്ടുണ്ട്. മുൻവർഷങ്ങളിൽ നടന്ന വിവാദപരമായ എല്ലാ ജെ.പി.എസ്.സി, ജെ.എസ്.എസ്.സി പരീക്ഷകളെക്കുറിച്ചും അഴിമതി ആരോപണങ്ങളെക്കുറിച്ചും സി.ബി.ഐ അന്വേഷണം പ്രഖ്യാപിക്കുക എന്നതാണ് ഇവരുടെ ആദ്യത്തെയും പ്രധാനപ്പെട്ടതുമായ ആവശ്യം.
പ്രാദേശിക അന്വേഷണ ഏജൻസികളെ ആശ്രയിക്കുന്നതിന് പകരം നിഷ്പക്ഷമായ അന്വേഷണം ഉറപ്പാക്കാൻ സി.ബി.ഐ അന്വേഷണം അത്യാവശ്യമാണെന്ന് ഫോറം ചൂണ്ടിക്കാട്ടി. ക്രമക്കേടുകളും ചോദ്യപേപ്പർ ചോർച്ച ആരോപണങ്ങളും ഉയർന്ന സാഹചര്യത്തിൽ 14-ാമത് ജെ.പി.എസ്.സി പ്രിലിമിനറി പരീക്ഷ പൂർണ്ണമായും റദ്ദാക്കി വീണ്ടും നടത്തണമെന്നും ഉദ്യോഗാർത്ഥികൾ ആവശ്യപ്പെടുന്നു.
ടി.ഡി.പി.എൽ (TDPL) ഏജൻസി നടത്തിയ എല്ലാ പരീക്ഷകളെക്കുറിച്ചും നിഷ്പക്ഷമായ അന്വേഷണം വേണമെന്ന് അവർ ആവർത്തിച്ചു. ജെ.എസ്.എസ്.സി – സി.ജി.എൽ മറ്റ് റിക്രൂട്ട്മെന്റ് പരീക്ഷകളിലെയും ക്രമക്കേടുകൾ പരിഹരിക്കുക, ഒ.എം.ആർ ഷീറ്റുകളിലും ചോദ്യപേപ്പർ ചോർച്ചയിലും നടക്കുന്ന ക്രമക്കേടുകൾ ശാശ്വതമായി അവസാനിപ്പിക്കുക, ജെ.പി.എസ്.സി, ജെ.എസ്.എസ്.സി എന്നിവയിൽ വിപുലമായ ഭരണപരമായ മാറ്റങ്ങൾ വരുത്തുക എന്നിവയാണ് മറ്റ് ആവശ്യങ്ങൾ. തട്ടിപ്പിന് പിന്നിൽ പ്രവർത്തിച്ചവർക്കെതിരെ കർശന നടപടി വേണമെന്നും വിദ്യാർത്ഥികൾ ആവശ്യപ്പെട്ടു.
ജാഖണ്ഡിൽ അഞ്ച് പേരെക്കൂടി സി.ഐ.ഡി അറസ്റ്റ് ചെയ്തു അതിനിടെ, പരീക്ഷാ ക്രമക്കേടുമായി ബന്ധപ്പെട്ട് ജാഖണ്ഡ് ക്രം ബെഞ്ച മാർഗ് (സി.ഐ.ഡി) അഞ്ച് പേരെക്കൂടി അറസ്റ്റ് ചെയ്തു. ഇതോടെ കേസിൽ അറസ്റ്റിലായവരുടെ ആകെ എണ്ണം 19 ആയി ഉയർന്നു.
For more details: The Indian Messenger
