ആവേശം വിതറി ‘ഓച്ചിറ ഏറൻ’; 28-ാം ഓണാഘോഷത്തിന് ആത്മീയ ഭാവമൊരുക്കി പുതിയ സംഗീതദൃശ്യവിരുന്ന്.
ഓച്ചിറ: കന്നി മാസത്തിലെ തിരുവോണ നാളിൽ ആഘോഷിക്കുന്ന ചരിത്രപ്രസിദ്ധമായ ഓച്ചിറ 28-ാം ഓണത്തിനും കാളകെട്ടുത്സവത്തിനും മാറ്റ് കൂട്ടി ‘ഓച്ചിറ ഏറൻ’ എന്ന വിശേഷാൽ ഭക്തിഗാനം തരംഗമാകുന്നു. പ്രവാസി ചിത്രകാരനും കവിയുമായ സുധീരൻ പ്രയാർ രചിച്ച ഗാനത്തിന്റെ ആകർഷകമായ വീഡിയോ എഡിറ്റിംഗ് നിർവ്വഹിച്ചിരിക്കുന്നത് അദ്ദേഹത്തിന്റെ പത്നി ആശാ സുധീരനാണ്.
“അകം വാഴും തമ്പ്രാനെ… അഴൽ മാറ്റും തമ്പ്രാനെ…” എന്ന ആത്മീയ വരികളോടെ ആരംഭിക്കുന്ന ഗാനം ഓണാട്ടുകരയുടെ കാളകെട്ട് പാരമ്പര്യത്തിന്റെയും ഭക്തിയുടെയും ഒത്തൊരുമയുടെയും ഉജ്ജ്വലമായ ചിത്രം സമ്മാനിക്കുന്നു. ആകാശത്തോളം കൊമ്പുയർത്തി പടനിലത്തേക്ക് പായുന്ന വെൺകാളകളുടെയും ചെങ്കാളകളുടെയും വീര്യവും, ഉലകേഴും കാക്കുന്ന പരബ്രഹ്മ സങ്കൽപ്പവും കവിതയിൽ അതീവ മനോഹരമായി ആവിഷ്കരിച്ചിട്ടുണ്ട്. “ഇരു വർണ്ണ ഋഷഭങ്ങൾ തലയാട്ടി വന്നേ… ഇളകുന്ന താടകളിൽ പൊന്മണിതൻ താളം…” തുടങ്ങിയ വരികൾ ശ്രോതാക്കളിൽ ഭക്തിയും നാടൻ ആവേശവും ഒരുപോലെ നിറയ്ക്കുന്നു.
നിർമ്മിത ബുദ്ധിയുടെ (AI) സാങ്കേതികവിദ്യ പ്രയോജനപ്പെടുത്തി ഈണവും ഓർക്കസ്ട്രേഷനും ഒരുക്കിയ ഈ ഗാനം, ആശാ സുധീരന്റെ മികവുറ്റ ദൃശ്യസംയോജനം കൂടി ചേർന്നപ്പോൾ മികച്ചൊരു ആസ്വാദന അനുഭവമായി മാറി. ഗാനത്തിന്റെ ഉള്ളടക്കത്തോടും ഓച്ചിറ ഉത്സവത്തിന്റെ വൈബുകളോടും തികച്ചും നീതി പുലർത്തുന്ന രീതിയിലാണ് വീഡിയോ എഡിറ്റിംഗ് പൂർത്തിയാക്കിയിരിക്കുന്നത്. സോഷ്യൽ മീഡിയയിൽ ഇതിനോടകം വൻ പ്രതികരണമാണ് ഗാനത്തിന് ലഭിച്ചുകൊണ്ടിരിക്കുന്നത്.
For more details: The Indian Messenger
