പ്രവാസി ഗൈഡൻസ് ഫോറം 17-ാം വാർഷികവും ‘ഓണപ്പൂത്താലം 2026’ ഓണാഘോഷവും ബഹ്‌റൈനിൽ സംഘടിപ്പിച്ചു.
സൽമാനിയയിലെ കെ. സിറ്റി ഓഡിറ്റോറിയത്തിൽ നടന്ന വർണ്ണാഭമായ ചടങ്ങിൽ, സൗജന്യ കൗൺസിലിംഗ് സേവനങ്ങൾ നൽകുന്ന പ്രവാസി കൂട്ടായ്മയായ പ്രവാസി ഗൈഡൻസ് ഫോറം (PGF) തങ്ങളുടെ 17-ാമത് വാർഷികാഘോഷവും ‘ഓണപ്പൂത്താലം 2026’ ഓണാഘോഷ പരിപാടികളും വിജയകരമായി സംഘടിപ്പിച്ചു.
ബഹ്‌റൈനിലെ ഇന്ത്യൻ എംബസി ഡിഫൻസ് അറ്റാഷെ ക്യാപ്റ്റൻ സന്ദീപ് സിംഗ് ചടങ്ങിൽ മുഖ്യാതിഥിയായി പങ്കെടുത്ത് ആഘോഷങ്ങൾ ഔദ്യോഗികമായി ഉദ്ഘാടനം ചെയ്തു. ദി ഡെയ്‌ലി ട്രിബ്യൂൺ ചെയർമാനും മുൻ കർമ്മജ്യോതി അവാർഡ് ഗ്രഹീതാവുമായ പി. ഉണ്ണികൃഷ്ണൻ വിശിഷ്ടാതിഥിയായി പങ്കെടുത്തു.
പ്രമുഖ പ്രവാസി സാമുഹിക പ്രവർത്തകൻ വേണു വടകരയ്ക്ക് അദ്ദേഹത്തിന്റെ സമർപ്പിത സേവനങ്ങളെ മാനിച്ച് പി.ജി.എഫ് നൽകുന്ന ഈ വർഷത്തെ ‘കർമ്മജ്യോതി’ അവാർഡ് സമ്മാനിച്ചതായിരുന്നു ചടങ്ങിലെ പ്രധാന ആകർഷണം. കൂടാതെ, രശ്മി എസ്. നായർ (പ്രോഡിജി), ബിജു തോമസ് (കൗൺസിലർ), റോസ് ലാസർ (ഫാക്കൽറ്റി), ജിഷ അനു വില്യംസ് (കോഓർഡിനേറ്റർ), രഞ്ജിത്ത് ജോൺ (സോഷ്യൽ സർവീസ്) എന്നിവരുൾപ്പെടെയുള്ള അംഗങ്ങൾക്ക് വിവിധ വിഭാഗങ്ങളിലെ മികവിനുള്ള പുരസ്കാരങ്ങൾ നൽകി ആദരിച്ചു.
ചടങ്ങിൽ പി.ജി.എഫ് തങ്ങളുടെ പുതിയ നോളജ് ഷെയറിംഗ് പ്ലാറ്റ്‌ഫോമായ ‘PGF മൈൻഡ് ഹബ്ബ്’ (PGF Mind Hub) ഔദ്യോഗികമായി പുറത്തിറക്കി. കൗൺസിലിംഗ്, സൈക്കോളജി, വിദ്യാഭ്യാസം, ഹ്യൂമൻ റിസോഴ്‌സ് ഡെവലപ്‌മെന്റ് എന്നീ മേഖലകളിൽ പ്രവർത്തിക്കുന്ന പ്രൊഫഷണലുകൾക്കും കൗൺസിലർമാർക്കും തങ്ങളുടെ അനുഭവങ്ങൾ പങ്കുവെക്കാനും പുതിയ കണ്ടെത്തലുകൾ ചർച്ച ചെയ്യാനും നെറ്റ്‌വർക്കിംഗിനുമായി ഒരു സഹകരണ ഇടം നൽകാനാണ് ഈ പ്ലാറ്റ്‌ഫോം ലക്ഷ്യമിടുന്നത്.
വിദഗ്ദ്ധർ നയിക്കുന്ന സെഷനുകൾ, കേസ് ചർച്ചകൾ, ഗവേഷണം, തുടർച്ചയായ പഠനം എന്നിവയിലൂടെ ശക്തമായ ഒരു പ്രൊഫഷണൽ സമൂഹത്തെ കെട്ടിപ്പടുക്കാൻ മൈൻഡ് ഹബ്ബ് സഹായകരമാകുമെന്ന് ഭാരവാഹികൾ വ്യക്തമാക്കി. പി.ജി.എഫ് പ്രസിഡന്റ് ബിനു ബിജു ചടങ്ങിൽ അധ്യക്ഷത വഹിച്ചു. ജനറൽ സെക്രട്ടറി ബിജു കെ.പി സ്വാഗതവും പ്രോഗ്രാം കൺവീനർ ജെയിംസ് ഫിലിപ്പ് നന്ദിയും പറഞ്ഞു.
വർക്കിംഗ് ചെയർമാൻ പ്രദീപ് പുരവങ്കര, മുൻ കർമ്മജ്യോതി അവാർഡ് ജേതാക്കളായ ഡോ. ബാബു രാമചന്ദ്രൻ, സുബൈർ കണ്ണൂർ, ബഷീർ അമ്പലായി എന്നിവർ ആശംസകൾ അർപ്പിച്ചു. പി.ജി.എഫ് ഭാരവാഹികളും അംഗങ്ങളും കുടുംബാംഗങ്ങളും ഉൾപ്പെടെ 250-ലധികം ആളുകൾ പങ്കെടുത്ത ചടങ്ങിൽ അംഗങ്ങളുടെയും കുട്ടികളുടെയും കലാപരിപാടികളും തുടർന്ന് വിഭവസമൃദ്ധമായ ഓണസദ്യയും ഒരുക്കിയിരുന്നു.
For more details: The Indian Messenger
