വിമാനത്തിനുള്ളിലെ ആക്രമണത്തിനിടയിലും യാത്രക്കാരെ രക്ഷിച്ചു; ഇന്ത്യൻ ക്യാപ്റ്റൻ സ്മിത് മച്ചാറിനും ഫ്ലൈ ദുബായ് ജീവനക്കാർക്കും യു.എ.ഇയുടെ പരമോന്നത ബഹുമതി.
ദുബായ്: ദുബായ്-ടെൽ അവീവ് വിമാനത്തിനിടെയുണ്ടായ ആക്രമണ ശ്രമത്തിൽ യാത്രക്കാരുടെ സുരക്ഷ ഉറപ്പാക്കാൻ ധീരമായി പ്രവർത്തിച്ച ഇന്ത്യൻ ക്യാപ്റ്റൻ സ്മിത് മച്ചാറിനും സഹ ഫ്ലൈ ദുബായ് ജീവനക്കാർക്കും യു.എ.ഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ ഒന്നാം ക്ലാസ് ‘ഓർഡർ ഓഫ് സായിദ് രണ്ടാമൻ’ (Order of Zayed II) പുരസ്കാരം നൽകി ആദരിച്ചു.
ദുബായ് കിരീടാകാശിയും ഡെപ്യൂട്ടി പ്രധാനമന്ത്രിയും പ്രതിരോധ മന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം ജീവനക്കാരുടെ ഉത്തരവാദിത്തബോധത്തെയും ധീരതയെയും പ്രശംസിച്ചുകൊണ്ട് മെഡലുകൾ സമ്മാനിച്ചതായി ദുബായ് മീഡിയ ഓഫീസ് ചൊവ്വാഴ്ച പുറത്തിറക്കിയ വാർത്താക്കുറിപ്പിൽ അറിയിച്ചു. പ്രസിഡന്റിന്റെ സാന്നിധ്യത്തിൽ നടന്ന പ്രത്യേക ചടങ്ങിലാണ് സ്മിത് മച്ചാറും ഫ്ലൈ ദുബായ് ക്രൂ അംഗങ്ങളും പുരസ്കാരം ഏറ്റുവാങ്ങിയത്.
സെപ്റ്റംബർ 30-നാണ് സംഭവം നടന്നത്. ദുബായിൽ നിന്ന് 170-ലധികം യാത്രക്കാരുമായി ടെൽ അവീവിലേക്ക് പറക്കുകയായിരുന്ന ഫ്ലൈ ദുബായ് വിമാനമായ FZ1073-ൽ വെച്ചാണ് ആക്രമണമുണ്ടായത്. അടിയന്തര ഘട്ടങ്ങളിൽ ഉപയോഗിക്കുന്നതിനായി കോക്ക്പിറ്റിൽ സൂക്ഷിച്ചിരുന്ന ക്രാഷ് ആക്സ് (കോടാലി) ഉപയോഗിച്ച് കോ-പൈലറ്റ് ക്യാപ്റ്റൻ മച്ചാറിനെ ആക്രമിക്കുകയും ഗുരുതരമായി പരിക്കേൽപ്പിക്കുകയുമായിരുന്നു. ആക്രമണത്തിന്റെ കാരണം ഇപ്പോഴും വ്യക്തമല്ല.
ഒമാൻ പൗരനാണ് ആക്രമണം നടത്തിയ കോ-പൈലറ്റെന്ന് ഇസ്രായേലി അധികൃതർ സ്ഥിരീകരിച്ചു. ക്യാപ്റ്റൻ മച്ചാറിനെ കുത്തിപ്പരിക്കേൽപ്പിച്ച ശേഷം ഇയാൾ വിമാനം കേവലം 30 സെക്കൻഡിനുള്ളിൽ 14,000 അടിയോളം താഴേക്ക് പതിപ്പിച്ചു. രക്തത്തിൽ കുളിച്ച് കോക്ക്പിറ്റ് തറയിൽ കിടക്കുമ്പോഴും തന്റെ അവസാന ഊർജ്ജവും സംഭരിച്ച് ക്യാപ്റ്റൻ മച്ചാർ കോക്ക്പിറ്റ് വാതിലിന്റെ ലോക്ക് തുറക്കുകയായിരുന്നു.
ഇതോടെ യാത്രക്കാരും ക്യാപ്റ്റൻ ഉൾപ്പെടെയുള്ള ജീവനക്കാരും ചേർന്ന് കോ-പൈലറ്റിനെ കീഴടക്കി. വിമാനത്തിലുണ്ടായിരുന്ന ഫ്ലൈ ദുബായുടെ തന്നെ മറ്റ് രണ്ട് പൈലറ്റുമാർ ചേർന്ന് വിമാനം സൗദി അറേബ്യയിലെ തബൂക്കിൽ സുരക്ഷിതമായി ഇറക്കി. ഒമാനിയായ കോ-പൈലറ്റിനെ കസ്റ്റഡിയിലെടുത്തു. ഗുരുതരമായി പരിക്കേറ്റ മച്ചാറിനെ ആദ്യം തബൂക്കിലെ ആശുപത്രിയിൽ പ്രവേശിപ്പിച്ചെങ്കിലും പിന്നീട് കൂടുതൽ ചികിത്സയ്ക്കായി അബുദാബിയിലേക്ക് മാറ്റി. വിമാനത്തിനുള്ളിൽ വെച്ചുണ്ടായ ആക്രമണത്തെ വിജയകരമായി ചെറുത്തുതോൽപ്പിക്കാനും യാത്രക്കാരെ സുരക്ഷിതരായി സൗദി അറേബ്യയിൽ ഇറക്കാനും ക്രൂ അംഗങ്ങൾക്ക് കഴിഞ്ഞു. യു.എ.ഇ ഭരണാധികാരിയിൽ നിന്ന് ലഭിച്ച ഈ ആദരവിൽ ഏറെ അഭിമാനമുണ്ടെന്നും പ്രസിഡന്റിന്റെ ഈ കരുതലിന് നന്ദി അറിയിക്കുന്നതായും പുരസ്കാരം ഏറ്റുവാങ്ങിയ ശേഷം ക്രൂ അംഗങ്ങൾ വ്യക്തമാക്കി.
പ്രസിഡൻഷ്യൽ കോർട്ട് ഡെപ്യൂട്ടി ചെയർമാൻ ഷെയ്ഖ് തിയാബ് ബിൻ മുഹമ്മദ് ബിൻ സായിദ് അൽ നഹ്യാൻ, ദുബായ് സിവിൽ ഏവിയേഷൻ അതോറിറ്റി പ്രസിഡന്റും ദുബായ് എയർപോർട്ട്സ് ചെയർമാനും എമിറേറ്റ്സ് എയർലൈൻ ആൻഡ് ഗ്രൂപ്പ് ചെയർമാനുമായ ഷെയ്ഖ് അഹമ്മദ് ബിൻ സയീദ് അൽ മക്തൂം തുടങ്ങി നിരവധി ഉന്നത ഉദ്യോഗസ്ഥർ ചടങ്ങിൽ പങ്കെടുത്തു.
സേവനരംഗത്തെ മികവ്, ധീരത, ഉഭയകക്ഷി-അന്താരാഷ്ട്ര ബന്ധങ്ങൾ ശക്തിപ്പെടുത്തുന്നതിലെ സംഭാവനകൾ എന്നിവ കണക്കിലെടുത്ത് വ്യക്തികൾ, നയതന്ത്രജ്ഞർ, ഉദ്യോഗസ്ഥർ, ക്രൂ അംഗങ്ങൾ എന്നിവർക്ക് യു.എ.ഇ പ്രസിഡന്റ് നൽകുന്ന ഉന്നത സിവിലിയൻ ബഹുമതിയാണ് ഒന്നാം ക്ലാസ് ‘ഓർഡർ ഓഫ് സായിദ് രണ്ടാമൻ’.
For more details: The Indian Messenger
