തിരുവനന്തപുരം: “വനം സംരക്ഷിക്കപ്പെടണം, വന്യമൃഗങ്ങളും സംരക്ഷിക്കപ്പെടണം. പക്ഷെ അതിനേക്കാൾ മുകളിൽ മറ്റൊരു ഉത്തരവാദിത്വം കൂടിയുണ്ട്, അതാണു ജനങ്ങൾ… കാട്ടുമൃഗങ്ങൾക്കാണ് ഏറ്റവും വലിയ ക്രൂരതയെന്നാണ് ഞാൻ കരുതിയത്. എനിക്കു തെറ്റി… പേടിക്കണ്ടത് ഇവരെയാണ്…” പ്രശസ്ത സംവിധായകൻ എം.എ. നിഷാദ് സംവിധാനം ചെയ്യുന്ന ‘ലർക്ക്’ എന്ന ചിത്രത്തിന്റെ ട്രെയിലറിലെ ഈ ശക്തമായ ഡയലോഗുകൾ ഇപ്പോൾ സോഷ്യൽ മീഡിയയിൽ വലിയ ചർച്ചയായിരിക്കുകയാണ്. ചിത്രത്തിൽ വനവും വന്യമൃഗങ്ങളും മനുഷ്യരും തമ്മിലുള്ള സംഘർഷമാണ് പ്രധാന പ്രതിപാദ്യവിഷയമെന്ന് വ്യക്തമാക്കുന്നതാണ് പുറത്തുവന്ന ദൃശ്യങ്ങൾ.
കഴിഞ്ഞ കുറേ നാളുകളായി നമ്മുടെ നാട്ടിലെ ഏറ്റവും പ്രാധാന്യമുള്ള ഒരു ജനകീയ വിഷയമാണ് വന്യജീവി ആക്രമണം. മുമ്പെങ്ങുമില്ലാത്ത വിധത്തിൽ വന്യജീവിയാക്രമണങ്ങൾ പെരുകുകയും നിരവധി പേർക്ക് ജീവൻ നഷ്ടപ്പെടുകയും ചെയ്തത് വലിയ ജനകീയ പ്രക്ഷോഭങ്ങൾക്ക് കാരണമായിരുന്നു. ഭരണാധികാരികൾ ഇതിനെ നേരിടാൻ ശക്തമായി രംഗത്തിറങ്ങിയിട്ടും ഇത്തരം ദാരുണമായ സംഭവങ്ങൾ ആവർത്തിക്കപ്പെടുകയാണ്. ഇവിടെ മനുഷ്യനേക്കാൾ വില വന്യമൃഗങ്ങൾക്കുണ്ടെന്നുള്ള യാഥാർത്ഥ്യവും, ഇതിനെയെല്ലാം ഒരു കവചമാക്കി മാറ്റി മുതലെടുപ്പ് നടത്തുന്ന ഒരു വിഭാഗത്തിന്റെ ഇടപെടലുകളും കാലികപ്രാധാന്യത്തോടെ ഈ ചിത്രത്തിലൂടെ ചർച്ച ചെയ്യാൻ ശ്രമിക്കുന്നുണ്ട്.
വരുന്ന ജൂലൈ ഇരുപത്തിനാലിന് തിയേറ്ററുകളിൽ പ്രദർശനത്തിനെത്തുന്ന ചിത്രത്തിന്റെ പ്രമോഷന്റെ ഭാഗമായിട്ടാണ് ഇപ്പോൾ ഔദ്യോഗിക ട്രെയിലർ പുറത്തുവിട്ടിരിക്കുന്നത്. മലയാളത്തിന്റെ മെഗാസ്റ്റാർ മമ്മൂട്ടിയുടെ ഉടമസ്ഥതയിലുള്ള പ്രമുഖ നിർമ്മാണ കമ്പനിയായ ‘മമ്മൂട്ടി കമ്പനി’യാണ് തങ്ങളുടെ സോഷ്യൽ മീഡിയ പേജുകളിലൂടെ ചിത്രത്തിന്റെ ട്രെയിലർ പ്രകാശനം ചെയ്തിരിക്കുന്നത്.
വന്യമൃഗങ്ങളുമായുള്ള പോരാട്ടം മനുഷ്യരാശിയുടെ നിലനിൽപ്പിന്റെ കഥയിൽ ആദ്യ അധ്യായങ്ങളിൽ ഒന്നാണ്. എന്നാൽ ഈ ഇരുപത്തിയൊന്നാം നൂറ്റാണ്ടിലും ഈ വിഷയം എത്രത്തോളം പ്രസക്തമായി നിലനിൽക്കുന്നു എന്ന ചോദ്യത്തിനുള്ള മറുപടിയുമായാണ് ‘ലർക്ക്’ എത്തുന്നത്. മനുഷ്യനും മൃഗങ്ങളും തമ്മിലുള്ള സങ്കീർണ്ണമായ സംഘർഷത്തിന്റെ കഥയാണ് ഈ സിനിമ പറയുന്നത്. കേരളാ ടാക്കീസിന്റെ ബാനറിൽ ആർ. ഹരികുമാറാണ് ഈ ചിത്രം നിർമ്മിക്കുന്നത്.
മലയാളത്തിലെ പ്രമുഖ താരങ്ങളായ സൈജു കുറുപ്പ്, അജു വർഗീസ്, പ്രശാന്ത് അലക്സാണ്ടർ, ടി.ജി. രവി, അനുമോൾ, മഞ്ജു പിള്ള, സരിതാ കുക്കു, ജാഫർ ഇടുക്കി, സുധീർ കരമന, പ്രശാന്ത് മുരളി, ബിജു സോപാനം, സോഹൻ സീനുലാൽ, സജി സോമൻ, വിജയ് മേനോൻ, കുമാർ സുനിൽ, വിനോദ് കെടാമംഗലം, റെജു ശിവദാസ്, ബിജു കാസിം, ഫിറോസ് അബ്ദുള്ള, സ്മിനു സിജോ, മുത്തുമണി, ബിന്ദു പ്രദീപ്, രമ്യാ പണിക്കർ, നീതാ മനോജ്, ഷീജാ വക്കപ്പാടി തുടങ്ങിയ വലിയൊരു അഭിനേതാക്കളുടെ നിര തന്നെയുണ്ട്. ഇവർക്കൊപ്പം സംവിധായകൻ എം.എ. നിഷാദും ചിത്രത്തിൽ ഒരു പ്രധാന വേഷത്തിൽ എത്തുന്നു. മാൻ മീഡിയയാണ് ചിത്രം തിയേറ്ററുകളിൽ എത്തിക്കുന്നത്.
ചിത്രത്തിന്റെ പ്രധാന അണിയറ പ്രവർത്തകർ ഇവരാണ്: കഥ, സംവിധാനം – എം.എ. നിഷാദ്, തിരക്കഥ, സംഭാഷണം – ജുബിൻ ജേക്കബ്, ഛായാഗ്രഹണം – രജീഷ് രാമൻ, ചിത്രസംയോജനം – വിപിൻ മണ്ണൂർ, ചമയം – സജി കാട്ടാക്കട, വസ്ത്രാലങ്കാരം – ഇർഷാദ് ചെറുകുന്ന്, കലാസംവിധാനം – ത്യാഗു തവനൂർ, പശ്ചാത്തലസംഗീതം – പ്രകാശ് അലക്സ്, ശബ്ദലേഖനം – ജുബിൻ രാജ്, ശബ്ദമിശ്രണം – ഗണേഷ് മാരാർ.
(With inputs from Vazhoor Jose)
Short Brief
The official trailer of director M.A. Nishad’s upcoming movie ‘Lurk’ was officially released by Mammootty Kampany. Slated for a theatrical release on July 24, 2026, the film is produced by R. Harikumar under the Kerala Talkies banner. Tackling the highly contemporary and volatile socio-political issue of man-animal conflict in Kerala, ‘Lurk’ highlights the plight of rural populations facing wildlife attacks. The movie stars an ensemble cast including Saiju Kurup, Aju Varghese, Anumol, and T.G. Ravi, alongside director M.A. Nishad in a pivotal role. The background score is composed by Prakash Alex.
(With inputs from Vazhoor Jose)
For more details: The Indian Messenger
