ഗൾഫ് മേഖലയിൽ എണ്ണ ഗതാഗതത്തിന് നിർണായകമായ ഹോർമുസ് കടലിടുക്കിൽ തടസ്സങ്ങൾ നിലനിൽക്കുന്ന പശ്ചാത്തലത്തിൽ, ബദൽ പൈപ്പ്ലൈൻ പാതകൾ വേഗത്തിലാക്കാൻ ഗൾഫ് രാജ്യങ്ങൾ നടപടി തുടങ്ങി. പ്രതിദിനം 1.5 കോടിയോളം ബാരൽ അസംസ്കൃത എണ്ണ കടന്നുപോകുന്ന ഈ പാതയ്ക്ക് പകരം മറ്റ് മാർഗ്ഗങ്ങൾ കണ്ടെത്തുകയാണ് ലക്ഷ്യം.
ഇറാന്റെ എണ്ണ കയറ്റുമതി ഒഴിവാക്കിയാൽ, ഹോർമുസിലൂടെ കടന്നുപോകുന്ന 1.32 കോടി ബാരൽ എണ്ണയിൽ 1.15 കോടി ബാരലും പുതിയ ബദൽ പൈപ്പ്ലൈനുകൾ വഴി തിരിച്ചുവിടാൻ സാധിക്കും. സുരക്ഷിതമായി എണ്ണ കയറ്റുമതി ഉറപ്പാക്കാനുള്ള ശ്രമത്തിലാണ് അയൽരാജ്യങ്ങൾ.
ഇതിൽ ഏറ്റവും മുന്നിൽ സൗദി അറേബ്യയാണ്. അബ്ഖൈഖിൽ നിന്ന് ചെങ്കടലിലെ യാൻബുവിലേക്കുള്ള സൗദിയുടെ ‘ഈസ്റ്റ്-വെസ്റ്റ്’ പൈപ്പ്ലൈന്റെ ശേഷി പ്രതിദിനം 70 ലക്ഷം ബാരലായി ഉയർത്തിയിട്ടുണ്ട്. സൗദി ഇതിന്റെ കൂടുതൽ വിപുലീകരണവും ആസൂത്രണം ചെയ്യുന്നുണ്ട്.
യു.എ.ഇ തങ്ങളുടെ അബുദാബി ക്രൂഡ് ഓയിൽ പൈപ്പ്ലൈനിന് സമാന്തരമായി രണ്ടാമതൊരു പാത നിർമ്മിച്ച് ഫുജൈറ വഴിയുള്ള എണ്ണ നീക്കം ഇരട്ടിയാക്കാൻ ഒരുങ്ങുകയാണ്. ഇറാഖിൽ നിന്നും സിറിയൻ തീരത്തേക്കുള്ള പൈപ്പ്ലൈൻ പുനരുജ്ജീവിപ്പിക്കാൻ യു.എസ് നേതൃത്വത്തിൽ ശ്രമങ്ങൾ നടക്കുന്നുണ്ടെങ്കിലും ഇത് പൂർത്തിയാകാൻ സമയമെടുക്കും.
സ്വന്തമായി ബദൽ പാതകളില്ലാത്ത കുവൈറ്റും ബഹ്റൈനും സൗദിയുടെ പൈപ്പ്ലൈൻ ശൃംഖലയുമായി ബന്ധിപ്പിക്കാൻ റിയാദുമായി ചർച്ചകൾ ആരംഭിച്ചിട്ടുണ്ട്.
For more details: The Indian Messenger
