ഫിഫ ലോകകപ്പ് ഫൈനൽ: തിങ്കളാഴ്ച സ്കൂളുകൾക്ക് അവധി പ്രഖ്യാപിച്ച് കേരള സർക്കാർ.
തിരുവനന്തപുരം: ഫിഫ ലോകകപ്പ് ഫൈനൽ മത്സരം പ്രമാണിച്ച് തങ്ങളുടെ പരിധിയിലുള്ള എല്ലാ സ്കൂളുകൾക്കും തിങ്കളാഴ്ച പൊതുവിദ്യാഭ്യാസ വകുപ്പ് അവധി പ്രഖ്യാപിച്ചതായി അധികൃതർ ഞായറാഴ്ച അറിയിച്ചു. ഫുട്ബോൾ പ്രേമികളായ വിദ്യാർത്ഥികളുടെ അഭ്യർത്ഥനയും ഇന്ന് രാത്രി നടക്കുന്ന ലോകകപ്പ് ഫൈനൽ കാണാനുള്ള അവരുടെ താൽപ്പര്യവും പരിഗണിച്ചാണ് ഈ തീരുമാനമെന്ന് അധികൃതർ വ്യക്തമാക്കി. പൊതുവിദ്യാഭ്യാസ വകുപ്പിന് കീഴിൽ പ്രവർത്തിക്കുന്ന എല്ലാ സ്കൂളുകൾക്കും ഈ അവധി ബാധകമായിരിക്കുമെന്ന് ഔദ്യോഗിക പ്രസ്താവനയിൽ പറയുന്നു.
പൊതുവിദ്യാഭ്യാസ മന്ത്രി എൻ. ഷംസുദ്ദീനും തന്റെ സോഷ്യൽ മീഡിയ അക്കൗണ്ടുകളിലൂടെ അവധി വിവരം പങ്കുവെച്ചു. “ഇപ്പോൾ സന്തോഷമായോ കുട്ടികളേ?” എന്ന് മന്ത്രി കുറിച്ചു. “ഫുട്ബോൾ പ്രേമികളായ വിദ്യാർത്ഥികളുടെ അഭ്യർത്ഥന മാനിച്ചും, ഇന്ന് അർദ്ധരാത്രിക്ക് ശേഷം നടക്കുന്ന ഫിഫ ലോകകപ്പ് ഫൈനൽ മത്സരം കണക്കിലെടുത്തും പൊതുവിദ്യാഭ്യാസ വകുപ്പിന് കീഴിലുള്ള എല്ലാ സ്കൂളുകൾക്കും തിങ്കളാഴ്ച (ജൂലൈ 20) അവധിയായിരിക്കുമെന്ന് കേരള പൊതുവിദ്യാഭ്യാസ വകുപ്പ് അറിയിക്കുന്നു,” അദ്ദേഹം പറഞ്ഞു.
നേരെത്തെ, അർജന്റീനയും സ്പെയിനും തമ്മിൽ നടക്കുന്ന ഫിഫ ലോകകപ്പ് ഫൈനൽ മത്സരം മുൻനിർത്തി തിങ്കളാഴ്ച സ്കൂളുകൾക്ക് അവധി നൽകണമെന്ന് സിപിഐ(എം) നേതാവും മുൻ വിദ്യാഭ്യാസ മന്ത്രിയുമായ വി. ശിവൻകുട്ടി സർക്കാരിനോട് ആവശ്യപ്പെട്ടിരുന്നു. ഞായറാഴ്ച വൈകി ആരംഭിക്കുന്ന ഫൈനൽ മത്സരം തിങ്കളാഴ്ച പുലർച്ചെ വരെ നീളുമെന്നതിനാൽ വിദ്യാർത്ഥികൾക്ക് കൃത്യസമയത്ത് സ്കൂളുകളിൽ എത്താൻ ബുദ്ധിമുട്ടായിരിക്കുമെന്ന് ശിവൻകുട്ടി ചൂണ്ടിക്കാട്ടിയിരുന്നു. നഷ്ടപ്പെടുന്ന പ്രവൃത്തിദിനത്തിന് പകരമായി സാധാരണ അവധിയായ ഒരു ശനിയാഴ്ച പ്രവൃത്തിദിനമാക്കാമെന്നും അദ്ദേഹം നിർദ്ദേശിച്ചു.
നിരവധി യുഡിഎഫ് നേതാക്കളും സമാനമായ രീതിയിൽ അവധിക്കായി അഭ്യർത്ഥന നടത്തിയിരുന്നു. പൊതുവിദ്യാഭ്യാസ മന്ത്രി എൻ. ഷംസുദ്ദീൻ, ഉന്നതവിദ്യാഭ്യാസ മന്ത്രി റോജി എം. ജോൺ, കായിക മന്ത്രി ഒ. ജെ. ജനീഷ് എന്നിവരും അറിയപ്പെടുന്ന ഫുട്ബോൾ പ്രേമികളാണ്. ഫിഫ ലോകകപ്പ് സമയത്ത് തങ്ങളുടെ പ്രിയപ്പെട്ട ടീമുകളെ പിന്തുണച്ചുകൊണ്ട് ഇവർ സോഷ്യൽ മീഡിയയിൽ പതിവായി കുറിപ്പുകൾ പങ്കുവെക്കാറുണ്ടായിരുന്നു.
English Summary
The Kerala General Education Department has declared a holiday on Monday (July 20) for all schools under its jurisdiction in view of the FIFA World Cup final between Argentina and Spain. General Education Minister N Samsudheen confirmed the decision on social media, stating it was based on requests from student football enthusiasts. The demand was earlier raised by political leaders, including former education minister V Sivankutty, pointing out that the late-night match continuing into the early hours of Monday would make it difficult for students to reach school on time.
With input from PTI.
For more details: The Indian Messenger
