സൗദിയിലെ ജിസാനിൽ ഹൂതി ആക്രമണം: രണ്ടുപേർക്ക് പരിക്ക്; മസ്ജിദിനും കെട്ടിടങ്ങൾക്കും കേടുപാട്.
റിയാദ്: സൗദി അറേബ്യയുടെ തെക്കൻ അതിർത്തി മേഖലയായ ജിസാനിലേക്ക് യെമനിലെ ഹൂതി വിമതർ നടത്തിയ ഷെൽ ആക്രമണത്തിൽ രണ്ടുപേർക്ക് പരിക്കേറ്റു. ശനിയാഴ്ച ഉണ്ടായ ആക്രമണത്തിൽ മേഖലയിലെ ഒരു മസ്ജിദിനും ഏതാനും കെട്ടിടങ്ങൾക്കും വാഹനങ്ങൾക്കും നാശനഷ്ടങ്ങൾ സംഭവിച്ചതായി സൗദി സിവിൽ ഡിഫൻസ് അറിയിച്ചു.
ജിസാൻ പ്രവിശ്യയിലെ അൽ-തുവാൽ ഗവർണറേറ്റിലാണ് പ്രൊജക്റ്റൈൽ പതിച്ചത്. തുടർന്ന് സിവിൽ ഡിഫൻസ് സംഘം സ്ഥലത്തെത്തി ആവശ്യമായ നടപടികൾ സ്വീകരിച്ചു. ജനവാസ മേഖലകളെയും സിവിലിയൻ സ്ഥാപനങ്ങളെയും ലക്ഷ്യമിട്ടുള്ള ഇത്തരം ആക്രമണങ്ങൾ അന്താരാഷ്ട്ര മാനുഷിക നിയമങ്ങളുടെ ലംഘനമാണെന്ന് സിവിൽ ഡിഫൻസ് വക്താവ് വ്യക്തമാക്കി.
കഴിഞ്ഞ കുറച്ചു ദിവസങ്ങളായി തെക്കൻ സൗദി അറേബ്യയെ ലക്ഷ്യമാക്കി ഹൂതികൾ മിസൈൽ-ഡ്രോൺ ആക്രമണങ്ങൾ കടുപ്പിച്ചിരിക്കുകയാണ്. ഇതിന് പിന്നാലെ മേഖലയിൽ സുരക്ഷാ പരിശോധനകളും പ്രതിരോധ നടപടികളും സൗദി അധികൃതർ ഊർജ്ജിതമാക്കിയിട്ടുണ്ട്.
For more details: The Indian Messenger
