ഒക്ടോബർ 15 മുതൽ UPI ചാർജുകൾ ബാധകമാകുമോ? അറിയേണ്ട പ്രധാന കാര്യങ്ങൾ.
ഒക്ടോബർ 15 മുതൽ ചില യു.പി.ഐ (UPI) ഇടപാടുകൾക്ക് മർച്ചന്റ് ഡിസ്കൗണ്ട് റേറ്റ് (MDR) ബാധകമാകുമെന്ന റിപ്പോർട്ടുകൾ ഉപഭോക്താക്കൾക്കിടയിൽ ആശങ്ക ഉയർത്തിയിട്ടുണ്ട്. എന്നാൽ എല്ലാ യു.പി.ഐ ഇടപാടുകൾക്കും ചാർജ് ഈടാക്കില്ല. വ്യക്തികൾ തമ്മിലുള്ള പണമിടപാടുകളും 2,000 രൂപ വരെയുള്ള സാധാരണ വ്യാപാരി പേയ്മെന്റുകളും തുടർന്നും പൂർണ്ണമായും സൗജന്യമായിരിക്കും. പുതിയ യു.പി.ഐ ചാർജുകൾ ആരെയാണ് ബാധിക്കുക, എത്ര രൂപ നൽകേണ്ടിവരും, ഉപഭോക്താക്കൾക്ക് എന്തൊക്കെ സൗജന്യമായി ലഭിക്കും തുടങ്ങിയ കാര്യങ്ങൾ വിശദമായി പരിശോധിക്കാം.
എല്ലാ യു.പി.ഐ ഇടപാടുകൾക്കും ചാർജ് ഏർപ്പെടുത്തുന്ന രീതിയല്ല പുതിയ സംവിധാനത്തിൽ കൊണ്ടുവരുന്നത്. ചില വ്യാപാരി ഇടപാടുകൾക്ക് മാത്രമാണ് മർച്ചന്റ് ഡിസ്കൗണ്ട് റേറ്റ് (MDR) ബാധകമാകുന്നത്. സാധാരണ ഉപഭോക്താക്കൾക്ക് നേരിട്ട് യാതൊരുവിധ അധിക ചാർജും നൽകേണ്ട സാഹചര്യമില്ലെന്നാണ് അധികൃതരുടെ വിശദീകരണം. സുഹൃത്തിനോ കുടുംബാംഗത്തിനോ യു.പി.ഐ വഴി പണം അയയ്ക്കുന്നതിന് ഇടപാട് തുകയെ അടിസ്ഥാനമാക്കി ചാർജ് ഈടാക്കില്ല. എത്ര വലിയ തുക അയച്ചാലും വ്യക്തിഗത ഇടപാടുകൾ (P2P) പൂർണ്ണമായും സൗജന്യമായി തുടരും.
കടകളിലും മറ്റ് വ്യാപാര സ്ഥാപനങ്ങളിലും നടത്തുന്ന 2,000 രൂപ വരെയുള്ള യു.പി.ഐ പേയ്മെന്റുകൾക്ക് ഉപഭോക്താക്കൾക്കോ വ്യാപാരികൾക്കോ അധിക ചാർജ് നൽകേണ്ടതില്ല. അതായത്, 1,000 രൂപയുടെ സാധനങ്ങൾ വാങ്ങിയാൽ യു.പി.ഐ വഴി കൃത്യം 1,000 രൂപ തന്നെയാണ് നൽകേണ്ടത്. 2,000 രൂപയ്ക്ക് മുകളിലുള്ള വൻകിട വ്യാപാരി ഇടപാടുകൾക്ക് മാത്രമാണ് വ്യാപാരികളിൽ നിന്ന് 0.4 ശതമാനം നിരക്കിൽ എം.ഡി.ആർ ഈടാക്കുന്നത്.
For more details: The Indian Messenger
