കൊച്ചി: ജി. മാർത്താണ്ടൻ സംവിധാനം ചെയ്യുന്ന പുതിയ ചിത്രമായ ‘ഓട്ടം തുള്ളൽ’ എന്ന സിനിമയിലെ രണ്ടാമത്തെ വീഡിയോ ഗാനം പുറത്തിറങ്ങി. “തീയേ തലൈവിയേ പാമ്പേ അണിഞ്ഞോളൂ…” എന്ന് തുടങ്ങുന്ന ഈ ഗാനം പ്രശസ്ത നടി മഞ്ജു വാര്യരുടെ ഒഫീഷ്യൽ സോഷ്യൽ മീഡിയ പേജിലൂടെയാണ് പ്രേക്ഷകരിലേക്ക് എത്തിച്ചത്.
ധന്യാ സുരേഷ് മേനോൻ രചിച്ച് റാഹുൽ രാജ് ഈണം പകർന്ന ഗാനം ആലപിച്ചിരിക്കുന്നത് കൃഷ്ണ ഭദ്ര സുരേഷ്, ഭാമ യാമി ഗൗരി എന്നിവർ ചേർന്നാണ്. ഒരു ക്ഷേത്രോത്സവത്തിന്റെ പശ്ചാത്തലത്തിൽ ഒരുക്കിയിരിക്കുന്ന ഈ പാട്ട് ചിത്രത്തിന്റെ ടൈറ്റിൽ ട്രാക്കായാണ് എത്തുന്നത്. ഏതൊരു വിശ്വാസിക്കും ഒരുപോലെ ആസ്വദിക്കാൻ സാധിക്കുന്ന രീതിയിലാണ് ഗാനത്തിന്റെ ആവിഷ്കാരം.
ആദ്യാ പ്രൊഡക്ഷൻസ് അവതരിപ്പിക്കുന്ന ചിത്രം ജെ.കെ.എസ് പ്രൊഡക്ഷൻസിന്റെ ബാനറിൽ മോഹൻ നെല്ലിക്കാട്ടാണ് നിർമ്മിക്കുന്നത്. സിറിയക്ക് ആലഞ്ചേരി കോ-പ്രൊഡ്യൂസറും ഹിരൺ മഹാജൻ, ജി. മാർത്താണ്ടൻ എന്നിവർ എക്സിക്യൂട്ടീവ് പ്രൊഡ്യൂസർമാരുമാണ്. സാധാരണക്കാരായ ആളുകൾ ജീവിക്കുന്ന ഒരു ഗ്രാമത്തിലെ ഒരു കുടുംബത്തിലുണ്ടാകുന്ന പ്രശ്നങ്ങൾ ആ നാടിന്റെ തന്നെ വിഷയമായി മാറുന്നതാണ് തികച്ചും നാടൻ നർമ്മ മുഹൂർത്തങ്ങളിലൂടെ ചിത്രം പങ്കുവെക്കുന്നത്.
വിജയരാഘവൻ കേന്ദ്ര കഥാപാത്രത്തെ അവതരിപ്പിക്കുന്ന ചിത്രത്തിൽ വിഷ്ണു ഉണ്ണികൃഷ്ണൻ, ബിബിൻ ജോർജ്ജ്, ടിനി ടോം, ഹരിശ്രീ അശോകൻ, മനോജ് കെ.യു, ജിയോ ബേബി, സിദ്ധാർത്ഥ് ശിവ, പൗളി വത്സൻ, സേതു ലക്ഷ്മി തുടങ്ങിയ വലിയ താരനിര അണിനിരക്കുന്നു. ബിനു ശിവറാമിന്റേതാണ് തിരക്കഥ. പ്രദീപ് നായർ ഛായാഗ്രഹണവും ജോൺകുട്ടി എഡിറ്റിംഗും നിർവ്വഹിക്കുന്നു. ചിത്രം സെപ്റ്റംബർ 18-ന് തിയേറ്ററുകളിലെത്തും.
For more details: The Indian Messenger
